Tikwel i kra,lhem ilaq ! Suq n Lḥed yellan d tamanaɣt n tɣiwant n Timizart deg At Jennad( dayra n Waggenun) tettidir ussan- a yiwet liḥala n utwer werǧin tessin akka zikk-nni. Sebbat n wenact-a mačči d yiwet. I tazwara d liḥala n wudem n « temdint-agi » ur nesefreḥ ara, imi ɣef ccedda ddren imezdeɣ-is deg ussan-nni n wedfel yezrin ( taɣiwant n Timizart teqqim ugar n ddurt mebla aman, trisiti, allalen n usiwel, lqela n waɣṛum d uyefki, lexṣas n lgaz akked d iberden ireglen maḍḍi deg ussan imezwura deg i d yeɣli wadfel-nni) nnulfen-d ihdumen nniḍen yeskecmen imezdaɣ-agi di lwehmat.
Win ara d yerzun ɣer Suq n Lḥed ( yettimɣuṛen simmal) ad yetwahem deg ayen ara d megrent wallen-is. Meṛṛa iberden –is meččen, nhuden, da d axemuj da d akedar. Di ttnaṣfa-nsen ttnejmaɛen waman acku tiregwa n usinef texdem yakken taɣiwant illindi ur yelli acu ibedlent alaxaṭar ur ttwaxedment-ara akken ilaq( ass-a i meṛṛa ttwerglent s yefrasen akked d yeblaḍen d tikaniḍin n lbira). Deg ibreden-agi yeqqimen d lesnin mebɣir i ṭruṭwaren ( rrif i yimsebriden) tumubilet ttnamarent di tujma widen iteddun ɣef uḍar( aɣbel-agi yenerna i tagra-agi s sebba n lecɣel i txedem takabanit n usekcem n lgaz ar yixamen, maca lecɣel teddun « ddecc ddecc » kan amzun ur yelli lḥir akken ad selken lecɣel, ɣef aya anda ma teddiḍ iɛamuren n wakkal i d-skeflen iqubac akked d ttmacinin tuget deg-s yeqqim kan akken ur yettwerfed ara, acu yettaǧǧen imadanen ttmederkalen fell-as mi teddun neɣ yettuɣal d ixmir mi i-dyeɣli ugafur). Nig taluft n yiberden ur ngarez wara, tella diɣ taluft n iḍuman iɛeǧren di yal tiɣmart( am akken i d-ttbanen u i d-ttraḥen si mbeɛid mi ara nɛeddi ɣer tama n waxxam n yelmeẓayen « Yusef U Qasi, neɣ di lḥara umi qarren « 14 n tmezduɣin » d wanda nniḍen) acku srabes n tɣiwant iɛedda agur ur d lhin d yefrasen-agiakken aten sinfen. Liḥala-agi tucmit-t tezmer ad tenced yir lehlakat i yimezdeɣ n Suq N Lḥed( meɛna tadyant teglugel amzun yiwen ur d yecqi) . Ɣef tuget n iɣablen agi, yenerna –d wayen nniḍen ɣef ayeg ur bnin imezdaɣ n tamdint –agi. Ahdum- agi id yenulfan d takurta, imi deg agur agi n Furar ḍrant-d tidyanin anda ttwakren-t tiḥuna akked d takarust n yiwen umezdeɣ. Takerḍa-agi id yenulfan tesekcem atwar akked lɣiḍ deg yixfawen n lɣaci, yeftel urif deg ulawen-nsen, yal yiwen amek yettmeslay , amek i yektal tamsalt ma d tuttra i d-yettuɣalendd tagi : « amek id ixef-is » ?
Di demma n wanact-a gren-d tiɣri kra n imezdeɣ n Suq Lḥed akken ad sbedden tasqamut
(tidukla n imezdeɣ n Suq n Lḥed) ara iqazmen taluft amer ad uɣalen-t tiregwa s imeḍqen-nsen-t s ulaɛi unṣib n wid teɛna taluft( Lwali, imdebren n dayra akked uselway n tɣiwant) akken as ggan udem tuklal i tmanaɣt n Timizart yernu ad yuɣal laman ɣer leḥwar-is !
Ait Slimane Hamid