Ahat mi ara d-nini Kefrida, d amazzer-nni i yettawin isem n temnaḍt-a icebḥen ara d-yerzun s aqerruy n yal yiwen. Imi taddart n Kefrida, i yeggugen s wazal n 60 n yikilumitren ɣer usamar n waɣir n Bgayet, d tin i yesɛan ayendin d imukan icebḥen deg ugama-is. D acu, aɛeqqa aberkan maḍi i nezmer ad d-nebder fell-as, d yir liḥala n ubrid i yessawaḍen ɣur-s mi ara tekkeḍ seg Ayt Idris. Abrid-a, mačči kan ḥeccer neɣ yettwaɣ deg kra n yimeḍqan, maca daɣen d amihan s waṭas i yinehharen i t-yesseqdacen am uzal am yiḍ. Deg tama iwumi ssawalen Ifalan, ur yelli unehhar i iḥemmlen ad d-yaweḍ dinna, acku d yiwen n ubrid i d-yessuturen tabɣest i win inehhren akken ad iɛeddi syinna. Tugart tugart ma yella bab n tkerrust d inebgi, meḥsub werǧin yusa-d ɣer Kefrida deg yizri. Ɣef waya ihi i zgan ssuturen yimezdaɣ akken ad yili ususeɛ n ubrid-a di kra n yimeḍqan, ad as-maggen yifergan anida urɛad muggen. « Nesɛa dinna tiferkiwin ideg nteẓẓu kra n tɣawsiwin, maca yal tikkelt nettɛuffu mi ara d-yaweḍ wakud ad nerzu, ɣef ssebba n yiberdan-nni gedged », i d-tenna yiwet n tmeṭṭut seg Ayt Smaɛel. Ad d-nesmekti d akken aṭas n yimdanen i iruḥen d iseflan deg ubrid-a n Ifalan. Wa terwel-as tkerrust, wa yecceḍ yis-s, armi yufa iman-is deg ucruf uɣdir. Daymi taggara-agi, aṭas i yessanafen aɛeddi seg Wayt Idris mi ara teddun ɣer Bgayet, ttaɣen srid abrid n Uweqqas. Deg-s meqqar rewlen i umihi n ubrid-nni, deg-s rebḥen-d kra n wakud imi yeqreb lḥal ugar. « Akken yebɣu yili, ur nezmir ad nerwel seg ubrid-nneɣ. Ula d imezdaɣ n Ayt Idris ur sɛin s anda ara rren. Ilaq kan ɣef yimḍebbren n tɣiwant-nneɣ ad rnun ad gen ttawil i ubrid-a akken ur t-yetthabi yiwen », i aɣ-d-yenna yiwen n umezdaɣ n Kefrida. Imi neẓra d tagrest i d-iteddun, anezgum n yimezdaɣ ad yeqqim d abrid-a n twilayt, melmi ara d-yili ugerrez-ines.
M. K.