Nemmeslay-d yakan fell-as deg teẓṛigin-nneɣ iεeddan, armi d tura i d-yeffeɣ udlis n yisefra :« D agellid, mazal ṣṣut-iw ad d-yebbaεzaq » ideg yerra tajmilit Σebdelḥafiḍ Cenan i uɣewwaɣ(rebelle) Maεtub Lwennas. Cenan netta d yiwen n umedyaz n at Xlili ( Mekla), yetwassen daɣen s usnulfu n yinnan yellan d yiwen n ṣṣenf n tsekla-nneɣ timawit, yessufeɣ-d yakan sin n yidlisen ideg yura innan i d-yesnulfa netta s timmad-is. Tikelt-a atan yuɣal-d s udlis-a n yisefra ideg d-isedda 78 d asefru, akk-nsen yexdem-iten d tajmilt ɣef ṛṛuḥ n Lwennas. 78 d amḍan n teṛṣasin iss qemḍen yiεdawen n tudert taṛwiḥt n Lwennas, Cenan yal taṛṣast yerra-tt d asefru i t-id-yessekfalen akken ad yeqqim i lebda. I wid yebɣan ad ɣṛen adlis-a, zemren ad t-afen di akk tinedlisin n Tizi Wezzu neɣ deg tnedlist « les beaux-Arts » i d-yezgan deg uzniq Didouche Mourad di Lezzayer Tamaneɣt, tura akka mass Cenan yettqam ad yegg azenzi s ubuddu deg waṭas n temnaḍin n tmurt n Leqbayel.
M.C