Nuja ideflawen(Schneewittchen/Blache-Neige) d yiwet ger tmucuha n watmaten Grimm d-yesmuḥyet Sεid At Mεemmer si tlalmanit. Ukkuẓ(4) gar-asent tmucuha-yagi, asefru yakkd tezlit i warrac, la ten-tkelles tnaẓurt Tatie Tamcumt, a d-yeffeγ usidi-nsen(t) di taggara unebdu-yagi n 2011.
A ziγ tameṭṭut tessen-as akken yessefk i ssuq ikaruren d ssḥur-nni yakk, teččur timceṭ d leḥwal-nni ttuqumen yemdanen i wiyaḍ, mi ara sen-εewlen ad ten-nγen, telsa-yas icettiḍen n menwala, terra iman-is amzun d kra n temγart-nniḍen, tezger sa idurar, tbedd-as i wexxam n sa iymuyuden zdat tewwurt, tendeh daγen:
“Ffγet-d ad tteqḍum
Ay imezdaγ n dagi!
Ffγet-d ad teqḍum,
Yella yal d lxir a wid ur t-nugi!”
Nuja ifeflawen tḍal-d kan si lecqayeq, tenna-yas-d:
Ddu d uḍar-im a yemma tamγart, kemmel kan abrid-im, nekk ur d-teldiγ tawwurt i yiwen!
« Ur d-teffe&gamma,; ur n-keččmeγ a yelli, wali-d kan xerṣum d tamuγli sselεa-w! », i d as-terra temγart.
Tessufeγ-d timceṭ-nni yettwaεemren, tmekken-as-tt i Nuja, akken ara tezmer ad tt-id-twali akken yessefk.
Seg wakken d-ffγent wallen n teqcict γef temceṭ-nni, ur tfaq ara d yiman-is, almi d as-tsebrareḥ tawwurt, teldi-yas-tt-id.
Akken msewwaqent γef ssuma iγef msefhament war uguren, tenna-yas temγart:
« Yya-d a yelli taḥnint, ad am-mecḍeγ aqerru-m s ifassen-iw, ad kem-gerrzeγ akk ma yehwa-yam! »
Taqcict taqeswaḥt ur tessuli ara yakk kra n yir leḥsab, war aḥezzeb d ukukru i d as-tuγ awal, tefka-yas aqerru-s i temγart ad texdem deg-s afernas.
Mazal akk d-iban uqerru-s yettwamceḍ ula d acemma, yewweḍ kan ugejdur-nni d as-d-sbubb i temceṭ s iẓuran uqerru n teqcict, din din tennefḍas, teγli d timendeffirt.
« Ṭṭef tura a taculliṭ n ccbaḥa, ṭṭef! »
i d as-d-tessegra zdeffir-s yir meṭṭu, sakin tessemneε iḍarren-is, tuγal s axxam.
Ula d tikkelt-nni tesεa zzher Nuja ideflawen, teḍra-yas twaγit lawan n tmeddit, dγa ur εeṭṭlen ara iymuyuden, bernen-d s axxam.
yettkemmil