Tamurt tecbeḥ s tmecraraqt n yiṭij i d-yeccelqafen tanafa taneggarut, yal tasebḥit, deg wusu n Tlelli. Iḍ iɛeddan, semmeḍ am acemma lḥal, tewwet nnda, rsent tmiqwa n waman ɣef ijeǧǧigen n lyasmin am waken ara tent-yesres ufus s lemḥadra mafaɣ ad ccḍent s akal..Tineggura-yagi ula d timiqwa n nnda ɛzizit seg waken i d-isuḍ waḍu n unaɣur ɣef tmurt n lxali. Deg udrar n yemma Ǧewwa i d-iḥellan Bgayet gar iɣallen-is, yal tasebḥit, ad tbedd di tqacuct ad tettak ddaɛwa n lxiṛ, amer ad d-yerr lemḥibba-s ɣur-s.. Deg wul teḥreq, tebɣa timlilit.Mi temmuqel di tmecraraqt n yiṭij yesderɣilen allen ad d-temmekti tamuɣli-s icuban ɣur-s, tamuɣli-s yessekwayen tiqit taneggarut i s yuɣ waẓar deg ul-is.. Ayen i d-ddren am tiqit n ljennet di tmurt n leqbayel xas akken ḥsan leḥmala nnsen am teslit n wanẓar, yiwen wass ad truḥ d asfel di tizi n twenziwin. Ulawen ḥebbken, iṭij aḥlawan, tizzegzewt tuɣ amkan, iserreḥ i ucewwiq, ccarwen ula d idurar: “ a kem-awiɣ ɣef yal tajeǧǧigt, yal tasebḥit, am-bruɣ, din , am tiqit..”. Nettat tegguni-tt tuɣalin ɣer wansi i d-teḥlelli, tellez xas ul-is yeččur ira timlilit..
Zira