Ayen yellan deg wayyuren iɛeddan, neɣ deg yiseggasen, d targit kan i ssaramen kra n tarwa n Uweqqas, ladɣa wid iqerben ɣer tdukkla « Taddukkli » deg taddart n Ayt Ɛisa, yuɣal tura d tilawt. Ha-t-an, la ttwasemrasent tigawin deg wannar i wakken ad d-yuɣal usenfar-a n umezgun n tezzegzewt, neɣ azegzaw, i ttraǧun Yizwawen merra. Tura akka, d tiwizi yessefraḥen i d-iḍerrun deg taddart n Ayt Ɛisa s ubnaw n ubraḥ-a n umezgun gar ṭṭjur, deg tmiṭ n yidurar. D aqeddic i d-yesmektayen lebni n yimaziɣen iqburen, neɣ d win n yirumanen n yiwet n tallit. Ɣef waya, d timrawin n yilemẓiyen i irezzun ɣer Ayt Ɛisa seg qeddac d tamnaḍt akken ad kkin deg usbedd n ubraḥ-a amaynut deg tegnit n ubeḥri d tili. D imal yelhan meqqar i ubrid i d-yenjer Muḥend Uyeḥya i usefti n umezgun azwaw d usbeyyen-ines gar leǧnas. Imi tura llan wid izemren ad d-awin aswir s tceqqufin n umezgun. Ihi ma ldin ugar n yixxamen d yibraḥen, am wa n Uweqqas, d ayen ara d-yernun ala lfayda, labaɛda, i warrac-nneɣ. Dɣa ad d-nesmekti belli, nnig n yibeddi n tdukkla turmidt Tadukkli n Ayt Ɛisa, gren-d afus ula d Izwawen iɣriben n Canada s uheggi n tbezzart i ujmaɛ n yidrimen ara yerren ɣer usemmed, aselzem, d uwenneɛ n umezgun-a n berra. Mazal yezmer yal yiwen, ad iɛiwen deg usenfar-a. Ladɣa ilemẓiyen n tmurt iɣef tteklen yidurar. Ma yella lewqam ibeddu seg Wat uxxam, ur seg yiwen n wudem kan.
Mhenni Khalifi