Tella-d yiwet n tfaska meqqren, ussan n 14 almi d 18 yunyu, deg tɣiwant Akfadu di lwilaya n Bgayet, ddaw uberriḥ « Tawennaṭ d tamsalt medden akk».Ihi, semmus w ussan n uwelleḥ ɣer usehbiber ɣef twennaṭ akken daɣ tella d tagnitt i umerreḥ deg idurar n Ukfadu yecɛacɛen d lesrar akk d ccbaḥa n teẓgi-ines.
Tafaska-ya theyya-tt-id tdukla Tiziri n Ferḥun« Association Bénévolat Thiziri de Ferhoun) deg Ukfadu, i tikelt tamenzut aseggas-a, terna tgerrez aṭas, iɣ d-nnan wid nesseqsa seg inebgawen. Aṭas n iqdicen id yellan deg w ahil ; Isaragen, timziknin, amerreḥ, amezgun, ccna, isefra, d tiyiḍ…Aṭas daɣ yemdanen id yerzan gar iḥewwasen d wid yekkin deg leqdic n tfaska-ya. Awal akk yezzi-id ɣef wamek i ilaq ad nesseḥbiber ɣef twennaṭ, ttawilat is-ilaqen d unezgum n yimdanen akken ad d-yuɣal d lfayda i umerreḥ deg temnaḍt-a.Aṭas n iḥerqan i yerɣan, deg iseggasen iɛeddan, d ayen id yeglan s lmaḍerra i lɣellat d tizegzewt n yimukan-a. Acukan ma imdanen rran-as azal i twanat-a, terna-d tegla-s s wallalen ddula, akka, nebla ccek ad yuɣal udrar n Ukfradu ad yekcem deg tgemmi taɣelnawt(patrimoine national), akken ssaramen iɛeggalen n tdukla Tiziri n Ferḥun.
Medlent twwura-s « T faska n Ukfadu » iḍ-nni n letnayen 18 yunyu s yiwet n tmeɣra tameqqrant id yellan deg w annar n tɣiwant n Ukfadu, Tameɣra anda yecna Karim Abranis d terbaɛt-is.Azal n walef yemferǧen id-yusan sya d sya akken ad walin w ad ceḍḥen s Rock-Aqbayli. Ar taggara, awal yuɣal almi d iɛeggalen n Tdukla Tiziri n Ferḥun akken ad snemmren wid akk d yerzan d imɛwnen, akken daɣ id fkan ttiɛad i qabel.
Samir At Buɛza