D akken neẓra di ddunit meṛṛa, imdanen, sexdamen di tmucuha nezzeh iγersiwen, acku i wakken tamεayt ad tεeddi u ad taweḍ γer yiswi ttadren-d yal abrid iγersiwen akken a sen-tishil tegwnitt, amedya γur-neγ s leqbayel, nessexdam uccen i tḥerci, izem i tebγest d tezmert… atg.
Deg waya ssawalen-d wat zik yiwet n tmacahutt γef win isderγil ṭṭmeε.
Yiwen wass yuḍen ugellid n lḥut iwweḍ γer lmuḥal, ihi cekṛen-as ul n wuccen d ddwa, iceyyeε ixeddamen-is i wakken a s-d-muqqlen uccen, mi ttnadin γef rrif n lebḥeṛ walan yiwen n wuccen la iddewwiṛ din, sawalen-as: Ay uccen?
Uccen:-Anεam.
Leḥwat:-Acu akka ara txeddmeḍ ay uccen?
Uccen:-Aql-aγ a nettnadi lmektub.
Leḥwat:-Tlata wussan ayagi nekni d anadi fell-ak.
Uccen:-D lxiṛ kan?
Leḥwat:-A d agellid-nneγ i ibγan ad yeg tameγra maca ibγa ad iseḥdeṛ akk yiγersiwen n tmurt, tura neεreḍ akk iγersiwen ala kečč i ixuṣen, ula d tameγra teḥbes γef lğal-ik, ihi sellek iman-ik, ayen tectaqeḍ din ad teṛwuḍ, kullec illa.
Uccen isderγel-it ṭmaε.
Uccen:-Besseḥ ur ssineγ ara ad εummeγ.
Leḥwat:-Awah! Ay uccen, akken newwi meṛṛa imaεraḍen ara k-nawi.
Semlalen iman nsen gan-as-d amkan gar-asen irkeb ruḥen, akken kecmen talemmast n lebḥeṛ, inṭeq yiwen uḥuwtiw γer wayeḍ:-Ilaq-aγ a-nγiwel neğğa-t-in inṭeṛ aṭṭas.
Uccen am win is-d-ifkan abeqqa, imekta-d mi is-tenna yemma-s ul nneγ d ddwa i leḥwat.
Inṭeq yiwen uḥuwtiw γer wuccen:-Ay uccen ayγer akka tsusmeḍ εni ur izhi ara wul-ik?
Uccen ifuṛes asteqsi-nni :-Awah! Ala ul-iw ur t-id-wwiγ ara ttuγ-t-in γef rrif n lebḥeṛ.
Dγa fqeεen leḥwat i mi ayen akken ḥwağen ur d-iddi ara, neṭqen γur-s:-S tidett ay uccen, ur d-tewwiḍ ara ul-ik?
Uccen:-Dayen ttuγ-t-in.
Leḥwat:-Ala ay uccen a-nuγal a t-id-tawiḍ yis-s ara tezhud di tmeγra.
Uγalen-d s temγawla akken id-wwḍen γer rrif n lebḥeṛ uccen ijelleb irwel.
Leḥwat:-Aniγer ay uccen, awi-d ul-ik tuγaleḍ-d γer tmeγra.
Uccen:-Awah! Tameγra n lebḥeṛ werğin telli.
Yeḥya Yanes