«Turart n ṣsa (07) twaculin» d tamezgunt yura-tt,d aɣen irra-tt s asayes mass :Ǧamal BenƐuf n terbaƐt «tgawt d wawal» n tidukla Numidya n Wehran. Indewlen (imariren) n tmezgunt d :Yunes Ressus, Maziɣ Reǧdal, Ǧeǧǧiga Benhlal, Yugurta Dewwadi, Ɛebdelqader Buḥadiba, Cahinaz Walaḥ, Ɛebdeṣsamed Benradi, Ǧamal BenƐuf. Anesɣamu aẓawan : Muḥamed BelleƐrusi. «Tigawt d wawal» tessuli ar ass-a semmus (05) tmezgunin : «Tamurt uƐkki»-«Aneggaru ad d-yerr tabburt, yečcur useqqif n ṭtmana.»-«Bu tcacit ulac-it»-«Ccix lkanun»- akk d tneggarut-agi «Turart n 07 twaculin».
Ḍren-as (ttwamudden-as) 25 warrazen u mazal lxir ɣer zdat.
Asentel iɣef d-tewwi tmezgunt «Turart n 07 twaculin» d tifranin n tkerkas d txidas yesseqdac udabu Azzayri yal mi ara d-yaf iman-is yettwaxneq seg yal tama…iwakken ad issenser iman-is seg tbaxixt i deg yerkkeƐ,yessefk ad inadi ijufar s wacu ara yessedreg ixixxan-is ger leǧnas am akken d-inna Ǧamal B. Tamezgunt tettwaseqdec s Teqbaylit-agi nettmeslay yal ass, d timssereḥt ad tt-igzu umeqqran d umeẓyan, deg-s tamellaɣt (comédie) s uswir Ɛlayen d kra n yinzan i as-irnan cbaḥa d unamek. Inzan wehhan srid d asawen ɣer wid i iṭtfen taqacuct n udabu seg tmunent ar ass-a. Seg tfelwit tamezwarut kan nezmer ad negzu aṭtas ɣef wayen ara d-iḍeffren segmi tamsalt ad d-tezzi ɣef tefranin n txidas acku agdud yenṭer ibɣa ad d-iffeɣ s abrid deg tmesbaniyin ara yessenhuzin leḥkem…
Ihi din din ad d-issawel Ssi Ɛebdelwaḥed i ufus-is ayeffus Ssi Ɛebdelbaqi ad d-heggin tifranin iwakken ad ilint ‘zeddigit’ yewwi-d ad ssawlen i Bu yetran, Ssi Rabeḥ, Ssi Ɛalem, Dda Akli, Nna Cabḥa-nsen d Ssi Fenyan ad ttekkin deg tefranin akken ad cebbḥen udem-nsen ɣer leǧnas s uttekki n tmeti… Mi d-iffeɣ ugmuḍ n tefranin d Ssi Ɛebdelwaḥed i d-yufraren, acku ferrnent azal n 20 yimelyunen d amdan, xas ulama deg tmurt-is akk s umdan s uɣersiw n ttrebga d win n lexla ur yettaweḍ ara wuṭtun-agi d-yefka.. Dɣa leǧnas ad as-d-ssbirken, wid itetten yid-s ad ssiɣerten …tagara ; «A win iɣef ishel walluy, ḥader iman-ik deg trusi» tella trusi Taqeddafit, tella trusi Tasarkuzit.
Mumuḥ Ɛezzuz