Dda Mḥend : azul a Sriffeg ! d acu i t-xedmeḍ akka ?
Sriffeg : Aql-i teẓẓɛeɣ izan, aɛyiɣ deg yiman-iw mačči d kra, ula d leḥyuḍ aɛyan deg-i.
Dda Mḥend : acimi akka i teɛyiḍ deg yiman-ik ? ddunit telha mačči d kra.
Sriffeg : telha ddunit ! waqila teskeɛrireḍ fell-i ?
Dda Mḥend : ad iyi-imneɛ Rebbi deg daɛwessu-k. tesneḍ ddadda-k Mḥend yettkellix ɣef medden, ruḥ steqsi akk at taddart ttirni, ak-d-inin akk dda Mḥend d aḥcayci. Yal yiwen yefka-as lkar-iis, yerna s taḍsa d lehcaca.
Sriffeg : Tenniḍ-iy-d ddunit telha ! anda akka tettwaliḍ lhu-agi-ines di tmurt-a di laɛnaya-k ? imdanen regglen ɣer tmura tiberraniyin, llan wiyaḍ zeggren ilell s teflukin, wa yewweḍ ɣer yeswi-s, wa yeǧǧa din tarwwiḥt-is. Lxedma ulac, tamezduɣt ula, keččini ad qqareḍ telha ddunit-a !
Dda Mḥend : Amek akka lxedma ulac ! tella, ahat ur –nudaḍ ara kan, «la forge» n taddart ha-tt-an temdel tewwurt-is, yuli-tt uɣebbar. Yya-d ad tt-neldi ad tt-xedmeḍ d aḥeddad.
Sriffeg : waqila ḥeqqrent-iyi wallen-ik. Widen ur neɣri ugin ad xedmen d iḥeddaden, nekkini imi d fɣeɣ di tesdawit, ad qqleɣ d aḥeddad.
Dda Mḥend : Akka tt-waliɣ akka, d kunwi i iḥeqqren amahil-agi n uḥeddad s tsuta-agi d yettnekkaren. Zik-nni s umahil-agi i s-wayess yettwassen yisem n uḥiṭus. At yeǧǧer akken llan si taddart n Mḥaga alarmi d taddart n Ḥura tt-gallan s tenfalit-a : «Aḥeqq sebɛa n zzbari n Yiḥiṭusen», ma d tura imi i ibeddel zmantettgallam s icelɣumen neɣ s tlawin. D «les chômeurs» acḥal d iseggasen-aya yerna tɣunzam amahil-agi n iḥeddaden.
Sriffeg : anda sneɣ ad xedmeɣ amahil-a.
Dda Mḥend : aya mačči d aɣbel, ak-sslemdeɣ, xas akka meqqreɣ di leɛmer, ad iliɣ ɣer tama-k, ayen akk i ssneɣ ak-temleɣ.
Sriffeg : tannemirt-ik a dda Mḥend, telliḍ-d allen-iw, lliɣ am win akken yeṭṭsen. Ur ẓriɣ ara akken «la forge»-nneɣ tesɛa amezruy.
Dda Mḥend : mazal ur ak-d-nniɣ ara kullec, maca ad as-nruḥ s laɛqel kan. Di tazwara, ak-mmleɣ amek ara tettsuḍuḍ lkir d wamek ara tekkateḍ afḍis ɣef zzebra, d uḍerraq n tgelzyam, d wamek ara tneɣceḍ imegran, d wamek ara temziḍ tifruyin d ijenwiyen, ad arnuɣ ak-sslemdeɣ amek ara tettsemmired iḥwicen.
Sriffeg : nnan-d t-xedmem ula d ibeckiḍen. Ad iyi-teslemdeḍ a dda Mḥend di laɛnaya-k ?
Dda Mḥend : imir-nni yella ṭṭrad mgal acengu Afransis. Agdud yuḥwaǧ ibeckiḍen. Ass-a acengu yeffeɣ. Tezzi-d talwit nettidir di lehna, iwumi-ten ara ibeckiḍen ass-a ? Ad nexdem allalen i imekrazen, ad yili ahat ad iḥwiǧen imegran, iqubac, tiglezyam… i wakken ad megren, ad neɣcen… imegrazen ttiḥwiǧen iḥeddaden.
Sriffeg : ah tesmektaḍ-iyi-d ɣef yiwet n tenfalit, acimi i qqaren mi sɛerqent i uḥeddad ad yekkat ɣef zzebra ?
Dda Mḥend : i kunwi iwumi ɛerqent mačči i nekni, ur teẓrim ansi id tekkam neɣ sani t-tteddum, ur iban d acu tebɣam. Di leɛmer tɛeddam akk 30 n yiseggasen, ur tezwiǧen, ur t-xeddmem. Nekni zik ur nessin ara d acu id lweswas, ur nettrebbi ara «les chômeurs» di taddart. Imal-nneɣ iban am yiṭij, win yeɣran iban yeɣra, win ur neɣri ad yuɣal d aḥeddad. Yečča lmal yefreḥ bab-is. Cfiɣ am wass-a asmi tzehher tḥanut, amzun d taɣrast n tzizwa. Sebɛa zzbari sṭenṭunent, yal yiwen iban cceɣl-is. Ass-a teɣli-d tsusmi, tessewḥac ula deg uzal qayli. A sidi Rebbi, ttɣilek jemmeɛ-iyin ad iliɣ gar wid ḥemmleɣ. Amkan-iw gar wid yemmuten…
Busad Hemmar