Nnan at zik s izik aẓar ijebbed ɣer tara, nebla aẓar ur tgem tara, ulama tegreḍ-t deg waman, acku ayen ɣef i tebded tilin ur yelli-ara. D alammi ɣas akken nekk-ad seg yiwen, maca tameddurt terra-aɣ ɣef waṭas, amzun akken ur d nekki seg-yiwen. Aya d ayen ara ad d-naf yurez ɣer tikli n yal yiwen.ama deg yiman-is ɣer yiman-is, neɣ deg yiman-is ger wiyaḍ, yal yiwen d tudert.
Mecḥuḍ: Ay at taddart
Aqbur yunez ɣer walim
Aṭas aya agellid d ttexmim
Amek ara yessider lqim,
Lqim d aɛeqqa deg uclim
Ma wer d-as-nessuzef alim
Ad yerbu ur d yettɛellim
Yenṭeq yiwen ger-asen, yettusemma ijerreb yessen ɣas akken s berru n wallen
Mḥend Uccen: Nesla-d i uberreḥ nuzzel-d ɣer tejmaɛt neger-d
Yal yiwen anida i as-tuqaɛ
Yiwen d tiyersi icudd-d
Yessebna ibeges-d
Aberraḥ d ccreɛ d ddreɛ
Ma yella ulac fella-s ales-d
Awal-ik yessed
Ssifses-it ad yenneḍbaɛ
Agellid 🙁 yekker fella-s yessaked aṭas) A lfahem ssefhem
Yekker-d yiwen ɣef tama-s d awal yessuter-as
Lewzir: Aqdim deg yisem-is iban
D ayen iɛeddan
Ger tizeṭ d umerzagu
Aqdim d ayen i wumi d cfan
D wid i d-yecfan
D tiɣaltin g ur yesfiḍ wagu
Ineɣ ɣas ur yezmir i uquran
Yeɛya deg reḍban
Wala tudert n wengugu
Ih! Awin i d yerren iseggasen
Ayen i as ifuten
Ad as yales deg-s ad yidir
A ten-yessired ad i rriqen
Di cbaḥa ad reqqen
Ccḥani ad ğğent anyir
Maca ayen ifaten
Am win yemmuten
Tudert d lmut ma ur tt-neddir
Di tejmaɛt acḍaḍ n tssusmi yers-d iles yuɣal d ẓẓebra. At Taddart temsakaden: aqdim! Alim! Aclim! Yenṭeq yiwen
Lweswas: Iwacu tuzzya d tunḍa?
Awal aɣaref ad t-yezzi
D acu i as-d-nekkes i luḍa?
I uceḥraraf imi nmezzi
Lemdek ma yekukra rriḍa
Rray-a d iḥizi
Agellid iruḥ yuɣal, amek ara d
yebru i wawal yeẓra lebɣi-s d lmuḥal, Maca deg-s yettuɣal Yecmumeḥ ad ibru i lfal Yerra uffal i uzzal
Agellid: Aqel-i am yiwen seg-wen
Ɣas llan widen iyi-ifen
I d-iyi-ifen d bu wurawan
Urawen-iw d nekk ger-awen
I win ur nelli ger-awen
D acu ara as-d-gen wurawen?
Ma yella tebɣam ad naẓ
Ad nebrez tagnit i lqim
S kra yellan d aleẓẓaẓ
Ad t-nenqeḍ ma uli ad aɣ-d-iqqim
i d-yegran deg uqdim d tufaẓ
Ma ur t-nefriẓ ad yeğğ aclim
Lemṭṭenṭen: Akken ad naẓ ɣer zdat
Ad nebdu s wadda i tirac
S tdukli ad nebges ɣer tifrat
Deg waṭas aya i nesseḥmac
Amek ara naweḍ ɣer tifrat?
Nemyundi ṭṭlam d tiqerrac
Agellid yezzi yules, Amzun yettwaqqes Tamsalt skud tettiɣzif, ɣef wudem-is iban yuyes, D ulaqrar yekyes, D leɛqel i izegren asif
Agellid: A lfahem ḥesses, Tenfel ɣas teqres, Ckal d
cakal, ɣas d rdif. Ay at taddart:
Awal nenna-t. Nebɣa Tifrat, nebɣa lmertat. akken ara naweḍ ɣer tifrat, ad nezwir di lmertat. ihi akken ad neffeɣ seg iḍelli, ad d-nali di lbir n yiḍelli, yewwi-d ad nejreḥ akken ad nefreḥ, akken nejreḥ akk.
Ih! Akken ad as-ner iḍelli-s iy iḍelli, ad as neg ass-a i wass-a. ad nernu ass-is i uzekka, s kra n wemɣar yellan ad yemmet. Yal win yesɛan amɣar ad yekk deffir yiri-s, acku deg yirawen-nsen i yezdeɣ yiḍelli, ma mazal ddren… yedder yiḍelli.Ih, iḍelli yebna-d ass-a, azekka ad t-nebnu s wass-a.ɣas iḍelli ma yebna-d ass-a, ass-a mačči d iḍelli ass-nneɣ d azekka, ma nessikid s iḍelli azekka-nneɣ d aẓekka.
Agellid yezzi s axxam. At taddart nefḍen awal yal yiwen d akken yessawal yendeh
Asayes 3
Buɛfif- Lemṭenṭen d At Taddart
Buɛfif: Amek! Tqeblem ad tenɣem ibabaten-wen?
Lemṭenṭen: Amek ihi?!
Buɛfif: Ad tenɣeḍ baba-k! Amek ara tenɣeḍ Baba-k i k-id yurwen! i k-id-yessekren! Yelluẓ teččiḍ, yeɛra telsiḍ, yeffud teswiḍ, yeḥzen tezhiḍ, yettru teḍsiḍ, yedduri ddel telliḍ. ass-a tajmilt ara d-as-terreḍ ad tenɣeḍ?! Selfet i
wudmawen-nwen nndama tettas-d d taneggarut, menyif win yeṭṭsen deg uɣilif wala win ara d-yekkren di nndama.
Lemṭenṭen: ɛni iɣaḍ-ik? D nutni i d ssebba n twuɣa-nneɣ (tasusmi) Ih! Limer mačči d nutni wamag aqel-aɣ akken nebɣa.
Buɛfif: Zewret-as leεqel! Tasa d tasa, ayen ur ak-d yefki baba-k alami ur t-yufi
Lemṭenṭen: Ula d kečč yella kra n Leɛqel? Atan
Ma d aya i d aɣbel yeshel ccɣel, ad ten-neneɣ tefra. syin ad nwali d acu ara d-ilalen.
At taddart yal wa yuɣal s axxam yeggra d buɛfif iman-is
Asayes 4
Buɛfif: (i yiman-is) Awah! D ayen ur d-nḍerru, amek! Nekk ad refdeɣ ifassen-iw ɣer Baba! D awezɣi ad nɣeɣ baba! (Tassusmi) ih, iḍelli! Limer mačči d iḍelli d acu ara aɣ-d-yessiwḍen ɣer wass-a? Akken yebɣu yili, d aberkan neɣ d asemmam, maca limer ur yelli d acu ara ɣ-d issiwḍen ass-a! (Yessawḍ-d umerɣud)
Asayes 5
Buɛfif, Amerɣud
Amerɣud: (s uqesser) Ih, agraw n taddart yefra, agraw n Buɛfif tura i yebda
Buɛfif: Ur yeɛmir ur yefri.Ih, ma tɣilleḍ d agraw winna!
Amerɣud: Ah! D acu i tixussen?
Buɛfif: Ur tufid i t-ixussen, yerbeḥ yufa-t, s wul-ik i d-tenniḍ akka?! (Tasusmi) i kečč s tidet yella win i izemren ad ineɣ baba-s?
Amerɣud: Ah! Aya iɛeddan tessawalem-iyi am mm-is n tağğalt, a Muḥend u mamma-s.
Tura teḥder-awen-d ad tuɣalem akk am nekk.nekk meqqar, d lmut i yemmut, teččur-as.wamma kunwi ad ten-tenɣem s yifassen-nwen (tasusmi, yeger-d nnehta) Ih! Limer yelli, ahat mačči akka ara iliɣ neɣ…Ahat ur yettili ara…
Akli Outamazirt