Mačči d drus ayen i d-iḍerrun d tiwaɣiyin yal ass deg yiberdan-nneɣ, gellunt s terwiḥin n umeẓyan d umeqqran, sgujjulent arrac. Ɣas tikwal tasebba n yisehwa (accidents) tettekk-d s berra n ufus n umdan, maca neẓra xersum amur ameqqran seg-sen d amdan i ten-id-yesseḥḍaren, ladɣa ilemẓi. Ama s war aqader n wangal n tenhert, neɣ s yir almad n tenhert deg uɣerbaz ansa i d-yewwi ttesriḥ (permis). Imi neẓra aṭas n yiɣerbazen n tenhert ass-a, i d-yessufuɣen yir inelmaden ɣer ubrid, akken d nutni ara yilin deffir yibaxixen azekka. «Heḍreɣ s timmad-iw i yiwet n tegnit n uttɛeddi ɣef usaḍuf, tessewhem-iyi ar tura. D bab n yiwen n uɣerbaz n tenhert i as-yessutren 3000 n yidinaren i win yesɛeddayen ɣur-s ma yebɣa ad yeḍmen rbaḥ n yiwen n ukayad !». D aya i aɣ-d-iwekked yiwen n yilemẓi seg usamar n Bgayet. Daymi ara tettwaɛiwid tmuɣli ussan i d-iteddun ɣef yiɣerbazen-a n tenhert d wid i ten-yesselḥayen, ɣef wakken i d-tewwi tɣamsa. Am uswir n win ara yeldin sya d tasawent aɣerbaz, i ilaqen ad yili d aɛlayan seg tama n tegzi d tmussni tadelsant akked tarrayt n uselmed ur ttqadaren akken ilaq at yiɣerbazen-a.
M. K