I lmend n usmekti wis 25 n tmettant n umusnaw n tmaziɣt Lmulud At Mɛemmer i ɣ-yeǧǧan ass 26 furar 1989 deg webrid-is n tuɣalin si tmurt n Meṛṛuk; inelmaden n uɣerbaz alemmas Lɛerbi At Ɛmer s ufus n Uxxam n Yilmeẓyen Keddac Ɛli, heggan-d ahhil adelsan s wayes rran tajmilt i win yuran “Tawrirt-Yettwattun», “Tajeṛṛumt n tmaziɣt», “Isefra n teqbaylit iqburen», atg. Aya yella-d i lmend ad yezgu usafu n tmusni i yessaɣ Dda Lmulud yecceɛceɛ, yekka-d nnig kra s-yettruẓun ifadden i yidles d tutlayt nneɣ. I wakken ad nezgu deg webrid n tmusni, ass nni n laṛebɛa 26 furar, tella-d temsizelt n tezbut s tmaziɣt i deg ttekkin azal n 20 inalmaden. Ar taggara ufraren-d kraḍ (3): Zenṭer Yasin, Ǧennan Melḥa akked Gennun Alisia. Tajmilt-agi i iɛeddan am lficṭa tkemmel azekka nni n lexmis. Imi deg-s i ttunefken warrazen i wid-agi d yufraren deg tezbut s tmaziɣt. Yeḥder unemhal n uɣerbaz, inemaden, yerza-d daɣen uqerru n tɣiwat n At Yanni. Akka i d tajmilt ara imenni Dda Lmulud: d asnerni n tutlayt n tmaziɣt ma begsen-as-d warraw-is. Acku tamusni am wakal, d axeddim n yal ass; mačči n yiwet n teswiɛt kan am lweɛda.
Agraw n inelmaden
Aɣerbaz alemmas “Lɛeṛbi At Ɛmer”