Tikelt-agi, tidukla tanaddalt n Wizgan s lemεawna n tesqamut n taddart, suddsen-d yiwet n ddurt tadelsant s teɣzi n 7 wussan ara yeddumen seg 8 ɣer 14 ɣuct 2009. Ddrut-a ad tili d tajmilt i yiwen n umeɣras n tegrawla n 54 iwumi qqaren Mas Bouda Mohand Said, iruḥen d asfel ɣef tmurt-is.
Ahil i d-swejden d amerkanti, timzeknin, isaragen, taceqquft n umezgun, tamedyazt, atg. Ass n 10 ɣuct, ad rzun ɣer uẓekka n umeɣras-a, syen ad yili wawal fell-as, rnu ad ldint tewwura ɣef uselmed n lḥirfat akked wurar ilmend n warrac imecṭaḥ. Ass n Lexmis 10 ɣuct d taggara n temlilit n ddabax-uḍar n warrac imecṭaḥ. Ass n Ljemεa 14 ɣuct d taggara n ddurt tadelsant, ad tili deg-s tikci n warrazen i yinelmaden i d-yufraren deg yikayaden (5ème, BEM, BAC), syen ad fken arrazen i yimawlan imeɣṛasen n tegrewla, tameddit n wass d tameɣra n taddart.
Islam Bessaci