M Mebεed rebεa n yiseggasen γef album-is amezwaru ‘’Wi icqa’’, acennay Mohsa yuγal-d s album wis sin iwumi isemma ‘’Iḍ d wass. 11 n tezlatin i yellan deg leqdic-agi igerrzen u yeṣfan : ama seg tama n yiḍrisen neγ seg tama n uẓawan (lmusiqa).
‘’Iḍ d wass’’ d akemmel n ’’Wi icqa’’ am wakken d ixef-nniḍen n wungal. Tizlatin-is, mseḍfarent-d am yiḍrisen n udlis : yal ta tcudd γer tayeḍ, ad as-tiniḍ tamacahut i d-yessawal.
Tizlit tamezwarut yewwi-d awal deg-s γef tejmaεt n taddart anda yal yiwen yebγa ad iεeddi rray-is, netta, xas ulamma ad as-yernu ciṭ n lekdeb i wawal-is. Tamsalt ur tefri ara imi timuγliwin mxalafent, yal wa yeṭṭef deg wawal-is, weḥd-s. Akka, dγa, deg tezlit tis snat iwumi isemma ‘’Aql-iyi weḥd-i’’ i yesḥissif γef usirem iγaben. Din, din yecna-d akked Kenza di tezlit tis tlata iwumi yeqqar ’’A wi yufan’’ anda yessaram i wakken yal yiwen ad yaf lebγi-s, iyi mačči weḥd-s.
Kenza-agi, neγ tameṭṭut s umata, d nettat i d kullec : d tafat, d tudert meεna aḥemmel-is yewεer mačči d izli…d ta i tizlit tis rebεa. Teryel, d yiwet n tezlit anda tameṭṭut tcennu, nettat, γef tayri, meεna d tayri n tmacahut anda ttilin yiwudam-nniḍen am uwaγzniw…Dγa, deg tezlit tis 6 yecna-d γef tayri gar zik d tura, yeqqar ‘’Ay ass-nni, anda-t wass-a ?!’’. Akka i ikemmel s tezlit tis 7 deg umgarad gar zik d tura, meεna tikelt-a yewwi-d γef wid-nni yettnuzun di ssuq am sselεa. Γef wanect-a, dγa, Dda Ḥemmu, di tezlit tis 8, i yeṭṭaxer i tdukli akked yimdanen yuγal γer yiγersiwen : yextar amcic d uqjun d imeddukal… Dagi, ‘’SAM’’, yerfa fell-as xas ulamma yerra-tt-id γef yiḍ d wass imi tudert akk d ’’Yiwen yiḍ, yiwen wass’’. Ula d ’’Faḍma’’, tizlit tis 10, ur tt-tezgil ara udewwer-agi n yiḍ d wass acu kan nettat d lweqt-nni ‘’Asmi ur tettamneḍ ara ad ak-id-yaf uzekka-nni…Di taggara, yesteqsay Mohsa ma yezmer ‘’Laṣer’’ ; tis 10, ad yili d tifrat i wuguren-agi, ‘’Neγ ihedder kan yettaddam waḍu’’ ? Ihi, wissen ma ad tefru tejmaεt-nni n taddart neγ ala ? Ad aγ-t-id-yini Mohsa d yimeddukal-is deg album i d-iteddun.
Hocine.M