Tesfaydi-d tɣiwant n Uɣrib, yetabaɛen ɣer dayra n Uzzefun, i d-yezgan deg ugafa n umalu n Tizi Uzzu, deg tɛecret n yiseggasen iɛeddan, seg yiwen usenfar n lebni n 200 n yidigen n tenzuyt. D yiwen usenfar gar yisenfar yettujerden deg wahil n uselway n tmurt, yeɛnan lebni n 100 n yidegan n tenzuyt i yal taɣiwant. Taɣiwant n Uɣrib, tesfaydi-d s 200 n yidigan n tenzuyt, 100 n yidigan n zyada ɣef tɣiwanin-nniḍen imi meqqer umḍan n yilmeẓyen ur nesɛi ara imeḍqan n lexedma. Maca, ass-a, idigen-agi, ttwaǧǧan, gqran-d deg yir liḥala, ɣas ma lecɣal n lebni kfan deg usenfar, d acu kan mazal urɛad ssiwḍen ɣur-s trisiti, aman d lgaz n temdint. Rnu ɣef waya aẓeṭṭa n waman yimesxen (réseau d’assainissement) i urɛad kfan s lxedma. Acḥal n yiseggasen seg wasmi ttwaǧǧn yidigen-agi, ass-a a-ten-an deg yir liḥala yehtutan d waṭas n wallalen yettwakren deg-sen. Gren-d yiɛggalen n Usqamu aɣerfan aɣiwan acḥal d tikelt tiɣri i yimḍebbren n Ugerzu n Tizi-Uzzu, i wakken ad fkan tadrimt iwulmen i ukemmel n lecɣal n usenfar-agi, maca ar ass-a, ur d-fkin ara rray asɛdi ɣef liḥana n yidigen-agi.
Ali Zalouk