Deg ussan-agi yezrin i d-yeffeɣ wungal amaynut n uneggal d umaru aqbayli Mass Rachid Boukherroub iwumi ifka azwel “Bab n wa ad yekkes wa” i d-yeffɣen ɣer tezrigin « El Amel » n temdint n Tizu Uzzu. D adlis n 144 n yisebtar, yettnuzu deg tnedlisin s wazal n 250DA. D ungal-nniḍen i d-yernan ɣer ugerruj n temkerḍit d tsekla tamaziɣt, d win ara d-yawin abaɣur i tutlayt-nneɣ. Yemeslay-d deg-s ɣef yiwent n tedyant i d as-id-yeḍran i yiwen n yilemẓi isem-is Mekhlouf, d netta i d awudam agejdan deg wungal-agi-ines wis sin, s tmaziɣt dima. D taqsiḍt n yiwen n uqcic i yeǧǧan yemma-s dagi deg tmurt n Lezzayer, netta yunag ɣer tmurt n Franca, mi d-yuɣal, yufa-d yemma-s temmut, yerna xedɛent wat taddart-is…atg. Ad d-nesmekti imeɣriyen belli, Mass Boukherroub mmi-s n tɣiwant n Boudjima, yella d aselmad n tfelsafit, tura akka ha-ta-n d anemhal n tesnawit n Ait Aissa Mimoun. D aneggal diɣen n sin wungalen s tutlayt n tyemmat, amezwaru yeffeɣ-d deg n 2015, i yewwin arraz amenzu n wungal amaziɣ deg temsizzelt taɣelnawt n Assia Djebar n wungal, deg useggas n 2016. Ma d wis sin-agi, akken kan i d-ilul, d wagi iɣef i d-newwi awal. Ungalen-agi-ines i sin yid-sen, ffɣen-d ɣer tezrigin “El Amel”.
A. A.