Ɣef wamek ẓran yimdanen, aṭas n Yiferkanen at teglimin tiberkanen i d-ikecmen tamurt seg wacḥal d aseggas tura. Ɣas ma llan ur caḍen ara, maca simmal irennu yettzid umḍan-nsen armi uɣalen ttwamẓaren deg qeddac n yidigan. Ladɣa deg yiberdan ansi ttɛeddayen lɣaci, imi ssuturen deg-sen tallelt n tuččit neɣ n tedrimt. Ɣas ma Iferkanen-a, ttuneḥsaben d iberraniyen gar tarwa n tmurt, lameɛna ineggura-a wulfen-ten degmi zgan ttwalin-ten. Acu kan, iban-d d akken iberkan-nni ur qqimen ara kan deg yiberdan, maca uɣalen ttawin iḍarren-nsen ula ɣer tudrin. Dɣa, aya yeḍra-d ussan-a deg temnaḍt n Ayt Smaɛel, i ibeɛden s wazal n 70 n yikilumiṭren seg waɣir n Bgayet, mi d-kecmen kra n Yiferkanen ɣer taddart, lfan tiferkiwin n yimezdaɣ. « Wehmeɣ ussan yezrin mi walaɣ deg tferka n yiwen seg taddart-nneɣ tameṭṭut d taberkant tbubb agrud, tettekkes rreman ɣas werɛad yewwa swaswa, teggar deg teckart war ma tcawer bab-is! ». I aɣ-d-tenna yiwet d Tasmaɛlit. D ayen i d-yessegzayen belli d ccer i d-yewwin Iferkanen ad lfun ayla n wayeḍ. Imi qqaren: “laẓ d akafer, win yelluẓen ad iker”. Daymi imezdaɣ n Ayt Smaɛel ur ɛriḍen ara, ad menɛen i Yiferkanen-nni ad nnalen igumma n ṭṭjur-nsen. Aha d ayen i iɛejben i yiberraniyen-a, yeǧǧa-ten ad qqimen deg temnaḍt n Ayt Smaɛel. Armi uɣalen mmeẓren leḥḥun sdat tḥuna, tama n yimezdaɣ. Kra seg Yismaɛliyen yusa-asen-d uḥulfu n uɣiḍi i Yiferkanen-a i d-yeggran deg ucali akken kan ad afen ayen ara ččen, neɣ anda ara sɛeddin uḍan. Kra-nniḍen, d akukru i d-yerzan ɣur-sen, imi tilin n yiberkanen-a, ttuggaden ad d-teglu s wayen ur nelhi.
Kaisa Khalifi