Segran-d yijajiḥen n tmes yekkren deg tuddar d tɣiwanin n lwilaya n Tizi Uzzu ɣef teɣzi n tlata waggur-nni n unebdu yezrin (yunyu, yulyu, ɣuct) n useggas-agi n 2017, s lmut n yiwen n umdan d ujraḥ n 17 n yimdanen-nniḍen yemxalafen deg leɛmer akked lexṣara deg wayen yeɛnan ixxamen, ṭṭjur, iɣersiwen n uxxam s wazal n 241 n yimelyan n Ddinar Azzayri. Ibeggen-d wulɣu-nni i d-yefka umaray amatu n lwilaya n Tizi Uzzu ussan-agi i iɛeddan, deg umeslay-is sdat n yiɛeggalen n Usqamu aɣerfan n Lwilaya (APW). Ijeml-d deg-s tixeṣṣarin swayes i d-glan yijajiḥen n tmes, d wid i d-yessegran s tmerɣiwt n 79 n yixxamen n tmezduɣt, aserɣi n 90000 n tzemmrin, timerɣiwt n 340000 n ṭṭjur yettarwen lfakya d 50 igetaren n wakal i yeẓẓan d timẓin d yirden akked 2300 n teɣrasin n tamemt ideg llant tzizwa d 340 d tilmawin akked usraɛ d ufsax n waṭas n yiɣersiwen ladɣa lmal amecṭuḥ. Iberḥ-d umaray amatu n lwilaya n Tizi Uzzu ddurt-nni yezrin, belli tixeṣṣarin-agi ttwajerdent merra deg yiwen n zzmam i yettunefkken ɣer tneɣlaft n ddaxel akked tijmuyaɛ timiḍranin i wakken ad asen-d-ɣermen s yidrimen i yifellaḥen akked yimezdaɣ-agi ḥuzant twaɣiyin-agi n tmes. Ɣer taggara, ad d-nesmekti belli yal amezdaɣ iwumi yerɣa uxxam-is, ha-t-an ad as-d-fken 70 melyun n ssuntim i wakken ad iɛiwen i uxxam.
A. A.