Asif Lexmis, yiwet n taddart i d-yezgan tama n unẓul n Leqser di Tubiret tebɛed seg-s s wazal n 15 n kilumitr. Mi ara taɣeḍ abrid metwal tamnaḍt-a, ad tettedduḍ tettefriwis tasa-k, imi abrid-is yexlan d win i d-yesrusun tugdi deg umsebrid ladɣa ma d win ur nessin amkan-a. Ttawilat n usiweḍ d wid ixuṣṣen s waṭas, imi wid yellan ttɛeddin di kra n lewqat yettuneḥsaben, mačči mi tebɣiḍ ara trekbeḍ. Mi akken kan ara tadfeḍ taddart, ad k-id-imager uɣerbaz alemmas. D ayen yessefraḥen, imi imezdaɣ n temnaḍt-a sfaydan-d s waya, d ayen ara yesneɣsen taɛkemt ɣef yinelmaden d yimawlan-nsen. D acu kan, aɣerbaz-a ṭṭuqtent fell-as tlufa, almi ur yessaweḍ ara ad d-iḥel igemmaḍ yelhan deg ukayaḍ n taggara n uswir alemmas. Aya, d ayen i d-ibeggnen yir tignatin ideg yettidir, imi kra akka n yiselmaden i d-yettasen si lebɛid ur zmiren ara ad d-ttawḍen di lweqt neɣ ahat ad xedmen akken iwata, mi ara ẓren ɣer tmeddit wissen ma ad afen win ara ten-yessiwḍen s ixxamen-nsen, neɣ taṣebḥit amek ara yawḍen s aɣerbaz. D tilufa yecban tigi, i yesneɣsen seg lebɣi-nsen. Si tama nniḍen, ttawilat yecban aman, neɣ annar i wurar iḍur aṭas inelmaden. Aman, ttasen-d s cceḥḥa ! Urar, yettili-d di ddiq, imi afrag n uɣerbaz mačči d win ara iqablen lesnaf n wuraren unṣiben. Tanmehla n uɣerbaz ur temniɛ ara ula d nettat seg tlufa, imi ttawilat n taywalt negren. Ulac tilifun n lxiḍ, ula d win n ufus ur iteddu ara daxel n uɣerbaz. Ɣef waya, yenna-d yiwen umdan dinna : « Mi nebɣa ad nessiwel, tella yiwet n tqacuct berra i uɣerbaz, ad nali ɣur-s, imir ad nessiwel s anda i nebɣa. Ma daxel n uɣerbaz, isawalen-nneɣ ur nfiɛen ara. » Da yen i yeǧǧan imḍebbren n uɣerbaz-a, tikwal, ur d-ttasen ara ɣer yinejmuɛen n tmehla n usegmi, imi ulamek ara ten-yaweḍ yisalli.
S. M.