Mi ara d-yaweḍ Lmulud, aṭas n twaɣiyin swayes i d-igellu usterḍeq n lḥerraqa, neɣ ma nezmar ad asent-nsemmi tibuciṭanin imi aṭas n leṣnaf i yellan. Am yal aseggas, d yiwet n temsalt i d-yettuɣalen deg uzniq-nni neɣ di ssuq-nni n useggas iɛeddan meɛna d wid i ten-yuɣen i yettemxallafen, acku yettali umḍan-nsen yal tikkelt. Tafaska n Lmulud d tin i yerzan ɣer tllalit n Nbi meɛna imdanen ttarran iḍ-nni n lmulud am ṭṭrad, anda yal yiwen yessṭerḍiq tibuciṭanin-nni i d-yuɣ. Mi ara tleḥḥuḍ di temdint n Tizi Uzzu, ad tegreḍ tamawt ɣer yiqiḍunen i yettwasbedden i lmend n usnuzu n tɣawsiwin-agi, s leswam ɣlayen s waṭas u xas ulamma tamurt tettidir di lḥers, maɛna anect-agi ur yeǧǧi ara ilmeẓyen akken ur tent i d-ttaɣen ara. Ma yella d imawlan, si tama-nsen, xas ẓran s wayen i d-ssugrayent, maca ɛemden. Tameddit n Lmulud, ttaččaren sbiṭarat s yimejraḥ imi timerɣiwt id-ttaǧant tineggura-agi, waɛrent ladɣa ma yella tḥuza yiwen deg wallen-is. Mačči kan daya imi ula d dexxan-nni i d-sufuɣent yesɛa lemḍarra, ladɣa ɣer wid yesɛan aṭan n buneggaf akken daɣen leṣwat-nni-nsent ssekcamen tugdi ɣer yigerdan imectaḥ . Ma yella nuɣal-d ɣer yismawen i d-asent fkan izayriyen i tbuciṭanin-agi ad d-nader : double bombe , fusil… amzun akken d allalen n ṭṭrad. Asteqi ara yeqqimen war tAt tɣawsiwin-agi ɣer ssuq azzayri xas akken d ayen i yettwagedlen , yerna ttnuzunt sdat n srabes n laman ?
S.Yamani