Imdebbren n Tubiret rran deg wussan-a ineggura yiwet n tejmilt ara yeqqimen i lebda i yiwen seg warraw-is i igren irebbi i yidles Azzayri sumata d uqbayli beddemma. Wagi, d Salah Sadaoui, yettwasnen ama s tezlatin ne s umezgun. D anazur yuran isem-is s yisekkilen n wureɣ, imi ɣas akka yemmut, maca ayen i d-yeǧǧa deffir-is d ayen ur yezmir umdan ad yessedreg.
3emmi Salah, imi akka i as-ssawalen kra akk n widen i t-yesnen, ilul deg useggas n 1936 di Tmellaht i d-yezgan tama n M’chedallah. Segmi kan i d-yuɣal baba-s seg lɣerba, ggujen ɣer Lezzayer tamaneɣt. Dinna, yemmuger achal n yimdanen, yal wa anda iqeddec. Imi ye3ceq deg ccna d uzawan, tettunefk-as tegnit ad yemlil akked Missoum, yettwasnen s lxedma-s deg uzawan. Yufa ihi annar anda ara d-ibeggen tiherci-s almi i d-yufrar gar akk widen yettilin deg terba3t. Deg useggas n 1954, uqbel ad yendeh uqerdas amenzu n tegrawla, yunag ɣer Fransa iwakken ad yexdem am netta am yizzayriyen irkelli. Yeṭṭef amkan deg yiwet n lluzin, maca, yal taggara n yimalas, ad yerfed agambar-is iwakken ad yecnu deg leqhawi gar watmaten-is. Almi iwala d akken yerfed-d iman-is, yeffeɣ seg lluzin iwakken ad yeldi yiwet n lqahwa deg Lpari. D tin i t-idegren ad yedduɣer zdat deg ccna, dɣa yessekles achal n tezlatin i mazal ar ass-a herzent amkan nsent deg unnar. Tagrawla yekkren tefka-as afud iwakken ad yecnu ɣef tlelli uqbel ad d-tass, imi anekcum-is deg terba3t n FLN di fransa tessawed-it ad yamen s timunent. Yecna ɣef tegrawla, lhif, lɣerba d watas n yisental i icudden ɣer tudert n uzzayri.
Nnig n ccna, yurar achal n tceqqufin n umezgun akked d watas n yinazuren yettwasnen. D acu kan, ass n 10 di maggu 2005, temmeɣ-d fell-as lmut am umeddiw, ur as-tejji tagnit ad yejji seg lehlak i ikecmen tafekka-s. Aseggas mbeɛd, imezdaɣ n taddart n Raffour, rran-as yiwet n tejmilt s wazal-is, imi snubgen-d atas n yimeddukkal-is iwakken ad d-mmeslayen fell-as. Kaci Tizi Ouzou, imi yexdem yid-s atas, yebra-d i yimettawen mi d-yebda awal. Yenna-d : « D argaz ! yesɛa nnif, lherma, tissas. Ur yettaggad, ur yettwexxir zdat n lbaṭel ». Ihi ass-a, d Tubiret i as-yerran tajmilt iwakken ad yeqqim yisem-is i lebda ad t-id-afent tsuta ara d-yasen.
Sylia. M