azal n 34 n yiselmaden n tmaziɣt ara yebdun amahil-nsen deg Lezzayer tamanaɣt aseggas-a aɣurbiz 206/2017. Isalli-a, yefka-t-id umaru amatau n Useqqamu Unnig n Timmuzɣa, Mass Si El Hachemi Assad i l’APS, smana-agi iɛeddan. ‘’Texdem tneɣlaft n leqraya asurif meqqer deg uselmed n tmaziɣt. Ha-t-an yewweḍ ɣer 34 n yimekwan n uselmed n tmaziɣt deg Lezzayer tamanaɣt, mebɛed mi llan kan sin yiselmaden dinna.’’ Yemmeslay-d, diɣ, yimḍebber n HCA, ɣef wazal yesɛa Uɣebaz Aɣelnaw Unnig n Bouzeréah i d-yessufuɣen iselmaden n tmaziɣt. Seg leɛḍil ara d-yili uselmed n tmaziɣt deg yal tama n tmurt n Lezzayer, ɣef wakken i mmsefhamen akked tneɣlaft n leqraya, akka tura, sselmaden tutlayt-a deg 32 n lwilayat. Deg tazwara n useggas, yella wugur n uselmed n tmaziɣt deg Lezzayer tamanaɣt imi xas llan yiselmaden iwumi fkan imekwan i wakken ad slemden, meɛna ufan-d iɛewwiqen akked kra n yinemhalen. Ɣe wanect-a, dɣa, i yeḍleb Useqammu Unnig n Timmuzɣa yiwet n temlilit akked yinemhalen n leqraya n lezzayer tamanaɣt i wakken ad frun akk timsal i d-icudden ɣer uselmed n tmaziɣt. I usmekti, 711 n yiselmaden ijdiden i d-yellan seg sin yiseggasen-agi iɛeddan i uselmed n tmaziɣt deg tmurt s umata. Ma ɣef wuguren i d-ttmagaren yiselmaden n tmaziɣt s umata, ha-t-an yettwaxleq-d Ugraw Aɣelnaw n Yiselmaden d Yinelmaden n Tmaziɣt i yennejmaɛen ass-nni n 12 deg unbir 2016 deg Tizi Uzzu anda i mmeslayen ɣef wuguren i d-ttmagaren deg unnar, ladɣa, wid-nni yellan berra n tmurt n leqbayel. Agraw-a, yessutur tifrat n yal aɛewwiq, ama d wid yeɛnan iṣudaf ama d wid i d-yettwaxelqen sɣur inemhalen n yiɣerbazen.
Zakia Ben Yahia