Ɣef wakken i d-yenna Idir deg yiwet n tedwilt n Berbère Télévision i d-ɛeddan ass-nni n ssebt 19 deg unbir 2016 , deg album-agi, ad cnun s teqbaylit yinaẓuren-a: Charles Aznavour, Patrick Bruel, Francis Cabrel, Maxime Le Forestier, Bernard Lavilliers, Henri Salvador…
Yal yiwen deg-sen, ad d-iɣenni tizlit-is s teqbayli, tizlit i d-yerra umedyaz ameqqran Meziane Kezzar ɣer tutlayt-a. Mačči d asuɣel i yexdem i tezlatin-a, meɛna yefka-asent azal-nsent s teqbaylit unelmad-agi n Muḥia. Ɣef wakken i d-yenna ucennay Idir, yezmer ad d-yeffeɣ album deg tefsut i d-iteddun ɣer tezrigin imi qrib ad isellek asekles-is. Album-agi ad t-id-yessufeɣ ɣer tezrigin Sony. Ma ɣef wamek i d-tella temlilit akked yinaẓuren-a ara yecnun yid-s, yenna-d :’’yebda-d kulec mi yesla Charles Aznavour i tezlit-nni-inu ‘’Lettre à ma fille’’, teɛǧeb-as u yessarem ad yecnu yid-i. Mi sliɣ s waya, nniɣ-as ula d nekk d ayen i bɣiɣ, ladɣa imi ḥemmleɣ aṭas tizlit-is La Bohème. ’’ Ha-t-an,ihi, amek i d-tebda temlilit akked yiccennayen-agi. Syin yemlal yiwen wass deg uxxam n Yanik Noah, Gérard Lenorman i as-d-iḍelben i wakken ad cnun akken. ‘’Ad tɣileḍ mmsefhamen yicennayen-a fell-i’’. i d-yenna Idir. Akka i tkemmel akked Bruel, Maxime Le Forestier, Bernard Lavilliers, Francis Cabrel…Mi skelsen tizlit La Bohème s teqbaylit, yeɛǧeb-as aṭas ubendayer i Charles Aznavour i yesɛan kra n yiɛewwiqen i wakken ad yini asekkil (ḥ). Ula d Patrick Bruel yeɛǧeb-as usexdem n umundul deg tezlit-is. Zyada ɣef yicennayen-a, ad tecnu yelli-s n Idir, Tanina, deg CD tizlit i tecna yakan Lettre à ma fille. Xas akken yeɛya seg kra n temsal, meɛna Idi ur iberru ara i ṭṭbel deg waman ‘’Llan kra ssefcalen, acu kan nekk ad kemmleɣ amecwar-iw xas ulamma yenqes wafud. Sya d afella, ad uɣaleɣ ɣer yiɣbula-nneɣ i wakken ad agmeɣ syin kra i ccna-w. ’’ akka i iwala temsal.
Hocine. Moula