Akken i t-id-iberreḥ deg umiḍan-is n Facebook, yeffeɣ-d ussan-a iɛeddan uḍebsi n ccna n Meẓyan Xalifi, iwumi isemma « Azuzzen ». Seld acḥal d akud i d-yettewten deg usekles d lecɣal-nniḍen yerzan asufeɣ n yiseɣrez, yelḥeq-d lawan ideg yezmer kra n win iḥemmlen asefru d uẓawan s teqbaylit, ad yettḥesses i sebɛa n tezlatin i yecna unubi Meẓyan deg uḍebsi-ines. Meẓyan Xalifi i d-ilulen deg useggas n 2002, i d-yekkren deg taddart n Ayt Smaɛel i yettwassnen s leqdicat-is idelsanen, gar-asen tafaska n tmedyazt i d-tettheggi yal ayyur n meɣres, yefren ula d netta tutlayt-is swayes ara yebnu awal, ara yessiweḍ i yimsefliden iznan s taɣect d uẓawan. Ladɣa imi segmi i d-yessen i yebda tayri i ccna d wayen yeqqnen i tẓuri, i yebda yettaru isefra, yesnulfay-d iẓawanen. Ad d-nesmekti d akken Meẓyan, yella yekki deg uḍebsi « Tifrat » i d-yessufeɣ gma-s Mhenni deg 2015, anda yecna yid-s amsin deg tezlit n unelmad. Yerra daɣen tajmilt s usefru i unaẓur Ɛli Ideflawen deg teẓrigt tis mraw d yiwen n tfaska n Udrar n Fad, anda i d-yettwaɛreḍ Dda Ɛli ad yili d inebgi. Aseggas-a dɣa, ɣas ilehhu ula d tɣuri-ines, yewweḍ ayen i yessarem seg wacḥal-aya mi yessekles, yessufeɣ-d album-is amezwaru. Liḥala n ugerruj, Anecṭayen, Aselmad-iw, Ccfawat, Eḍs i ddunit, Tameɣra, d Timseɛraq, i d sa n yizwal i yefka Meẓyan Xalifi i tezlatin-is timaynutin, ideg i d-ttwawin yisental yemgaraden s umeslay iweznen d uẓawan icebḥen. « Tuffɣa n walbum-a-inu amezwaru d ayen ibanen teslal-iyi-d tumert. Ferḥeɣ imi awal-iw ad as-slen wiyaḍ, maca ad umreɣ ugar ma yehwa i yimsefliden. Aya ad i yi-d-yernu tabɣest i wakken ad neǧreɣ abrid ». I aɣ-d-yenna Meẓyan Xalifi.
Kaisa Khalifi