Ɣef yismilen imetiyen am facebook akked twitter, imseqdacen n lintirnit n tmurt n Tunes zgan-d gar aḥih d ahah. Teḍra yid-sen am win iwumi teɛreq lqebla. Gar usirem akked tugdi ur tt-frin ma ilaq ad ḍṣen neɣ ad run. Tugdut i d-ilulen s lketra n yimenɣi d tuget n leɛtab akked yineẓman , tugdut i d-yeflalin menbeɛd tagrawla n lyasmin aɛni ma d- teǧǧ isennanen, ad tuɣal d aseklu, d aḥeccad ur nettmudu iguma n leḥlu ? D wa i d -asteqsi n kra n win i d- yegren iman-is s annar n uskasi s ttawwil n lweb menbeɛd tafrant n ugraw amendaw I d-yellan ddurt-agi yezrin di tmurt n Tunes. Sebba n waya d tugdi ikecmen imeyyaten n yibermaniyen( citoyens) n tmurt-nni imi d akabar n “Nehda” izedwen ɣef tesnakta( idéologie) tineslemt i d- yefɣen d amenzu deg tefranin- agi.
Aṭas n yitunsiyen i yugaden ad teḍru yid-sen am akken i teḍra yid-neɣ asmi i d- yufrar ukabar n FIS di tefranin n 1991. Ayen i tedder tmurt n Lezzayer ad yeqqim i lebda d aktay deg yixf n yal yiwen.
Ɣef aya, reffu akked ccekk zedɣen ulawen n yimezdaɣ n tmurt n Tunes abeɛda tilawin yugaden si tura ɣef yizerfen-nsent amer ad nquqlen.
Tamurt-agi n Tunes i d- yefkan amedya s tegrawla n lyasmin yessawḍen ad teɣḍel leḥkem n usnaraf( dicatateur) Ben Ɛali , d tin ara yeɣlin gar yifassen n yimfugal n ṭṭlam ? D tin i d- yefɣen seg yimi n wuccen akken ad teɣli gar yifassen n bururu ? Ayagi d ussan ara t-i d- yinin, am akken i aɣ- d- yenna Boubeker s ttawil n Lweb. Si lǧiha-s yenna Malek yellan d anelmad : « aql-aɣ la nlemmed tugdut. Xas kan i d- llant tefranin- agi, maca ɣur-i taflest d akken, tilelli, d tin ara yafen amḍiq –is di Tunes, acku kra i nɛetteb iwakken ad neɣḍel tasnaraft ( la dictature) d awezɣi ad nɛemmed ad d-yeffeɣ ubendu » . Dalila, yellan d taselmadt, tenna : « ayen ɣef ilaq ad necfu d akken tifranin- agi tilelliyin timenza di tmurt-nneɣ ɛeddant di tezdeg,ulac imenɣi, ulac tucḍa, aṭas n yibermaniyen nneɣ i iḥulfan d akken i tikkelt tamenzut ttekkan di lebni n yimal n tmurt. Aya, yebɣa ad d-yini belli sya d afella ur nɣeffel ara ɣef yizerfan nneɣ, aql-aɣ di lmendad n tugdut , akken tafat akked yizerfan n yal yiwen ad reṣṣin di tmurt-nneɣ. »
Gar usirem akked tugdi n wayen yellan d uffir, Itunisiyen rran lewhi nsen ɣer yimal, di lawan deg, akka d wakka, aḍu n tegrawla simmal yettṣuḍu-d akken ad yessenquqel lsas n i tesnarafin (les dictatures) anda ma llant.
Ait Slimane Hamid