Deg yiseggasen yezrin, ur yelli deg lbal n yimdanen d akken aḥric n usellek ad yili d annar uɣur ara adfent tulawin. D tasga meḥsub yettwaheggan i wid yesɛan tabɣest acku d amager n twaɣiwin n yiberdan, n tmes, n zlezla, leḥmali d waṭas n lecɣal ideg ṭṭuqten lehmum. Maca, akken i llan yirgazen ikesben tabɣest i llant tulawin sut tebɣest. Hafida Laouadi, d yiwet n tmeṭṭut yessaramen seg temẓi-s i wakken ad tili « d tanejbart » i wid yeḍrurin. Akken kan i d-teffeɣ seg tesdawit d tajenyurt, tekcem annar n usellek deg useggas n 2007 s usellun (grade) n lyuṭna. Mi tekfa tannant, aseggas mbeɛd, tuɣal d lqebṭan anda i tella d timḍebbert deg tnedbalt n uḥric-a yellan deg temdint n Tubiret. Deg 2011, tbeddel amekkan, tuɣal d tanemhalt deg yiwet n tenmehla yellan dima di Tubiret, uqbel ad d-tuɣal alamma d tanmehla-nsen. Deg waggur n yulyu 2017, tettuɛeggen d timḍebbert deg Bechloul anda i tella weḥd-s gar yirgazen, mi d-tenna : « Aql-i xeddmeɣ gar yirgazen, ala nekk i d tameṭṭut gar-asen, maca ur d-mmugreɣ ara iɣeblan. Amahil-nneɣ, iteddu akken iwata, ttqabaleɣ tiswiɛin akken bɣunt ilint, imi ḥemleɣ aḥric-a n usellek. » Am wakken i aɣ-d-tenna Massa Laouadi, d akken tura deg uḥric n usellek aṭas n tlawin i yettuɛeggnen i wakken ad d-lhint d usellek deg teswiɛin iweɛren ayen yecban alluy ɣer wanda yebɛed d wayen icudden s asellek seg yifran.
M. Smail