Akken i d-nenna deg yisallen iɛeddan, yekcem unezgum d tteeqlaq imezdaɣ n temnaḍt n Ayt Smaɛel ɣef waddad n tegnawt i d-ixedmen lḥamu, taɣart akked temḍerrit deg tsemhuyt n tegrest yezrin.
Maca, segmi i d-teldi tefsut tiwwura-ines s kra n wussan, yebda yettbeddil lḥal, simmal tesseɣlab tesmeḍ ɣef lḥamu aqesḥan, armi I d-tebrez amkan-is deg ugama i yellan qrib ad ibeddel akk tugna s fad i t-yeṭṭfen. Dɣa deg wayyur n meɣres iɛeddan, ladɣa deg wussan-is ineggura, aṭas n yigeffuren d yideflawen i d-yewwten ɣef tmurt. Yeswa wakal, swant tebḥirin d ṭṭjur. Swan yimɣan, rwan aman i ten-ixussen seg wacḥal-aya. D ayen i d-yeslalen tumert i wid merra i yellan ttkukrun ussan i d-iteddun, ttuggaden yir igemmaḍ swayes zemren ad d-glun. D acu kan, lehwa i d-yeɣlin s waṭas, tga-d kra n temḍerrit deg temnaḍin yemgaraden, gar-asent tin n Ayt Smaɛel i ibeɛden s wazal n 70 n yikilumitren ɣef waɣir n Bgayet. Aya seld ayen yeḍran ɣef tmentilt n yiɣeẓran d tregwa i yeččuren armi i d-feggḍen, d iḥemmalen i yewwin kra n yiberdan, rwin tibḥirin, swaɣen ayen yettwaẓẓan deg-sent. Am yilel i teqqel lqaɛa s waman i tt-yessarden seg yiwet n tama, i tt-yeswesxen seg tama-nniḍen, imi truḥ d idigan. Iḥemmalen-nni, szeɛfen nezzeh imezdaɣ n taddart n Ayt Smaɛel imi ẓran mačči d igenni i yeccḍen mi i d-yebra i waman s ccyaḍa, maca d astehzi n tɣiwant i yekkin s umur ameqqran deg tuffɣa-nsen seg yiɣeẓran d tregwa i yemmuggen i ujmaɛ. Ladɣa imi acḥal d akud tura, segmi yekker umeslay fell-asen, yella deg wahil ad asen-yettwakkas tikwal uhicur, ad d-ttwassizdagen akken ad yili deg-sen listaɛ, wannag ar ass-a urɛad gren deg ccɣel-nsen.
Kaissa Khalifi