I lmend n usmekti s wass agraɣlan n tlelli n tɣamsa, i d-yettilin di 03 maggu n yal aseggas, tanmehla n yidles s tallelt n tiddukkla n yineɣmasen d yimazzanen n lwilaya n Tizi Uzzu (AJCTO), heggan-d leqdic d anesbaɣur ɣef teɣzi n sin wussan. Tazrigt n useggas-agi, yezzi deg-s wawal ɣef usentel-agi: “Timlilt timettit n uneɣmas”, i d-yellan deg Uxxam n yidles Mulud Mɛemmeri akked uɣerbaz alemmas Mulud Ferɛun n Tizi Uzzu. Ass-nni n lexmis 03 maggu 2018, yella-d deg-s ɣef 09h00 n ssbeḥ, usersi n tmeqqunt n yijeǧǧigen ɣef usebdad n tlelli n tɣamsa, yellan deg temdint n Tizi Uzzu. Ma ɣef 10h00 n ssbeḥ, yella-d usarag s ṣṣenf n table ronde deg tzeqqa tameẓyant n uxxam n yidles Mulud Mɛemmeri. Yezzi deg-s wawal ɣef wuguren i d-tmugger tɣamsa tazzayrit d wanida tewweḍ tlelli n tɣamsa deg tmurt n Lezzayer sɣur Lazhari Labtar akked Belkacem Mostefaoui. D tagnit, diɣ, anda i tuɣal tejmilt i yineɣmasen Sadek Ait Hamouda akked Salah Yermeche. Am wakken daɣen, i d-llan waṭas n temsikniyin n tugniwin akked yimagraden n tɣamsa tazzayrit yemgaraden, deg tzeqqa n temsikniyin n Uxxam n yidles ɣef teɣzi n wass. Tella-d diɣen temsirt tapidakujit ɣef wass agraɣlan n tlelli n tɣamsa, sɣur yineɣmasen Mohamed Haouchine, Said Ait Mebarek akked Rachid Hammoutene, anida i d-fkan ilugan n tira n yimagraden yemxalafen; addal, idles, isallen. Xedmen diɣ timsizzelt n unelmad aneɣmas, i d-yellan i lfayda n yinelmaden n uɣerbaz alemmas Mulud Ferɛun, deg tmeddit n wass-nni n lexmis. Ass-nni n lǧemɛa 04 maggu 2018, yella-d usersi n waṭas n tmeqqunin n yijeǧǧigen ɣef yiẓekwan d yisebdaden n yineɣmasen yefkan tarwiḥt-nsen i tɣamsa tazzayrit d tlellit-is.
… Ula d Bgayet tella deg ttiɛad
Tiddukkla n yineɣmasen imazzanen n lwilaya n Bgayet (AJCB), tella ula d nettat deg ttiɛad n usmekti n wass agraɣlan n tlelli n tɣamsa, i d-yellan ass-nni n lǧemɛa iɛeddan, 03 maggu 2018, deg Temkerḍit tagejdant n Bgayet. I lmend n wannect-a, tsuddes-d ahil d amerkanti, ideg ara naf asersi n tmeqqunt n yijeǧǧigen deg Umraḥ n tlelli n tneflit Said Mekbel, yellan deg temdint n Bgayet. Syin ɣur-s, d taɣuri n ugenna (déclaration) n tddukka n yineɣmasen imazzanen n lwilaya n Bgayet, anida i d-begnen lɣiḍ-nsen ɣef waddad n tlelli n tɣamsa deg tmurt n Lezzayer d wuguren i d-ttmagaren yal ass deg umahil-nsen yineɣmasen akked yimazzanen. Ma ɣef 13h00, tella-d tejmilt meqqren s kra n tbidyutin i yineɣmasen yemmuten i d-tefka lwilaya n Bgayet, i d-yefka aṭas i tɣamsa n tmurt tazzayrit. Yella-d diɣ usarag d uskasi, sɣur uneɣmas-amaru Ammar Belhimer, i d-yewwin awal ɣef usentel-a “Addad n tlelliyin deg tmurt n Lezzayer”.
Gh. Amazigh