Iɛeggalen n tddukkla « Tadukkli » n Ayt Ɛisa, n tɣiwant n Uweqqas, gren-d akuden-a iɛeddan asenfar-nniḍen d amaynut ara yilin deg tama n Buṭeɣwa. Seld Amezgun n tzegzewt, i bnan s twizi s wudem n tsegda tarumant, ha-t-an ɛewwlen, ad sbedden Axxam n yidles ara d-yernun ayendin d abaɣur i uḥric n yidles deg temnaḍt-a. « Aṭas-aya nekni nettxemmim i ccɣel am wa, imi neẓra nxus deg yimeḍqan anda nezmer ad nexdem kra n tfuggliwin, neɣ ad d-nheggi kra n wayen akk yerzan idles ». I d-tenna tselwayt n tddukkla iɣef i d-nettmeslay, Massa Farida Jabri. Terna-d daɣen deg yiwen n usatal: « Axxam-a n yidles, ad yili d uzzug. Nebɣa ad t-nebnu am wakken ttwabnan yixxamen izwawen zik. Yettusemma ad ilin deg-s ujgu alemmas, ssṭeḥ, taɛrict, ad ilin daɣen uddaynin, ikufan ». I lmend n usbedd n teḥjurin ara yilin d tiɣrabin n uxxam-a n yidles, tḥebber-d tddukkla yiwet n tmacint tamzikt temmug beddemma i uxdam-nsent. Ɣef wakken i d-teqqar teɣbalut-nneɣ, am usenfar n umezgun dɣa, ad yettwabnu uxxam-a n yidles s twizi n lɣaci i yebɣan ad d-awin afus n tallelt i tddukkla tadigant.
M. K.