Lǧemɛa-agi sdat-nneɣ, 8 yunyu 2018, ad tili temlilit taseklant tis tlata n tddukkla tadelsant Tussna n tama n Ubizar. D timlilit, ideg ara d-awin awal yimsaragen Ḥamid Bilek akked Ḥelwan Hassan ɣef usentel-a. “Tamaziɣt, d asenfar n tmetti; seg Bulifa ar Mɛemmeri, abrid yenǧer”. Ad yili usarag-agi ɣef 22h00 n yiḍ, deg uɣerbaz amenzu Alma n taddart n Ubizar, yellan deg tɣiwant n Timizar. Yetturaǧu, di temlilit, ad d-awin awal sin-agi n yimussnawen/imnadiyen ɣef wamek i d-tedda tmaziɣt d wacu uɣur tewweḍ? Acu i as-mazal? Ad d-yili diɣ uskasi ɣef temsal akk icudden ɣer tutlayt d yidles amaziɣ. Annect-a, ad yili s yisteqiyen ara d-fken wid yellan din i sin-agi iselmaden-imnadiyen. Nutni si tama-nsen, ad ɛerḍen ad d-rren akk ɣef yisteqsiyen i d asen-yettunefken ɣer yimferǧen. Ad nesmekti kan, belli deg wussan-agi iɛeddan, xedmen yakan snat temliliyin-nniḍen. Yiwet, tella-d ass-nni n ssebt 2 yunyu 2018 sɣur umaswaḍ/amnadi di tmaziɣt Ɛerqub Ɛebdella akked uselmad/amedyaz Ḥsen Maric. Awal yezzi deg usarag-agi-nsen ɣef ibeddi mgal unekcum n Yiṭerkiyen ɣer tmurt n Leqbayel. Tayeḍ, tella-d deg waggur-agi iɛeddan sɣur yinaggalen-agi Buxerrub Racid akked Ali Ḥeǧaz. Nutni si tama-nsen, meslayen-d ɣef tirmit-nsen deg tira ldɣa ungal. Ɣer taggara, ad d-nini belli d timliliyin am tigi i d-yettawin abaɣur i tmetti, yettili-d deg-sent ubeddel n tikta akked tmuɣliwin gar yimdanen. Am wakken daɣen i d-yettili usqerdec n yal tamsalt i izemren ad tenfeɛ yis-s tmetti taqbaylit. D isaragen akked temliliyin i teḥwaǧ assa-a tmurt n Leqbayel i wakken ad yili ubeddel neɣ usenfel n kra tɣawisiwin i ireṣṣan iman-nsen deg tmetti-agi iɣef i d-nettmeslay.
Adaoun Abdelghani