Ass-a n letniyen, 25 deg yunyu, ara teẓunẓet tenmehla n tmerrit d tinḍi, s wudem unṣib, tasemhuyt n useggas n 2018, deg teftist n Carrobier yettabaɛen ɣer dayra n Uẓeffun. Ad tili tẓenẓuyt-a sɣur imeḍebber amezwaru n ugerzu n Tizi Uzzu, Mass Muḥamed Bouderbali d unemhal n tmerrit d tinḍi, anemhal n yilmeẓyen d waddal, tanemhalt n yidles, imeḍebber amezwaru n dayra n Uzeffun, aselway n tɣiwant d imḍebbren n srabes yettabaɛen ɣer ugerzu n Tizi Uzzu, akked tddukliwin d ikabaren n tsertit. Ɣef leḥsab n yisallen i d-yefka yimeḍebber amezwaru n tenmehla n tmerrit d tinḍi, Mass Rachid Ghedouchi, i tɣamsa taɣelnawt, ttwaheggan-d yal ttawilat i wakken ad tɛeddi tsemhuyt n unebdu deg tegnatin igerrezen, d uqabel n 12 n yimelyunen n yimariyen yettuɛeggnen ad sɛedin imuras-nnsen, anebdu-agi, deg teftisin yemgaraden yettabaɛen ɣer tɣiwanin n Tegzirt d Uzeffun.
Ali Zalouk