Par DDK | 9 Juillet 2018 | 1268 lecture(s)

Ajdid deg ccna

Ait Lakhal Mehmed acennay yufraren

D acennay, ulamma meẓẓi di leɛmer, maca meqqer ccan-is d wazal-is. D bu ṣṣut ḥlawen akked uẓawan igerren, wagi d Ait Lakhal Mehemed, mmi-s n Tizi Uzzu. D anaẓur s timmad-is, imi icennu yerna yessefray. Yettawi-d isefra neɣ tizlatin i t-iɛejben ɣer yimedyazen d yicennayen-nniḍen s tfenṭazit. Ilul deg useggas n 1976 deg taddart n Tajdiout deg ladayra n Maatkas.Yebda ccna deg useggas n 1983, imir-nni yettales-asen i tezlatin n yicennayen imeqqranen i tessen tezlit taqbaylit. Syin akkin deg useggas n 1998, iɛedda-d deg nnuba-nni “Iɣennayen n Uzekka” n Mdjahed Hamid snat n tikkal. Syinna, yenǧer-d abrid ɣer ccna, dɣa deg useggas n 2003, yessuffeɣ-d tasfift-is tamezwarut “Imeṭṭi n layas” ɣer tezrigin Igawawen. Llant deg-s 8 n tezlatin, 7 deg-sent d aɛiwed i iɛawawed yecna-tent, ma yiwet deg-sent “Imeṭṭi n Layas”, d ayla-s. Tin ɣur-s di 2004, yessuffeɣ-d tasfift-is tis snat “A yemma!”. Llant deg-s 08 n tuɣac, 6 deg-sent d ayen yexdem netta, snat-nni-nniḍen n yicennayen-agi; Youcef Abdjaoui akked El Hasnaoui. Mebɛed mi d-yemlal aṭas n wuguren, yeḥbes azal n 7 n yiseggasen. Dɣa di 2011, yessazreg-d album-is wis tlata “Ilaq usirem”, ideg ara naf 12 n tezlatin, 11 deg-sent d netta i ten-yuran i d asen-ixedmen lmusiga, ma tinna-nni-nniḍen d ameddakkel-is ad-tt-d-yefkan yecna-tt. Deg tazwara-agi n 2018, i d-yerna aḍebsi wis rebɛa ɣer umecwar-is di ccna. D album i wummi isemma “Tajmilt i Matoub, Yir aqbayli”. Dɣa tizlit-agi, yecna-tt yakan Matoub, maca netta yerra-as yis-s tajmilt. D aḍebsi-ines aneggaru, ideg 8 n tezlatin, 7 d ayla-s netta, ma d tis 08 d tajmilt-agi n Lounes Matoub. Gar tezlatin yellan deg-s, ad d-nebder; Lesleḥ (allal n uẓawan), Yurez-iyi lqid, Nndama, Leɛrac, Lwerd lyasmin, Ṭṭejra n ččina...atg. Yessuffeɣ-tent-id ɣer tezrigin “Guraya musique” n Bgayet, imi ɣef leḥsab-is ur yeɛǧib ara usekles-nni yexdem deg Tizi Uzzu deg yiwen ustudyu. Ɣer taggara, ad d-nesmekti kan belli, ha-t-an yettheggi yiwen n album amaynut ara d-yeffɣen deg useggas n 2019 i d-iteddun neɣ ɣer sdat. Ma deg wawal-is, yebɣa ad yessiweḍ izen-agi: “Mi ara tafeḍ yiwen yettɣenni s teqbaylit ɣef teqbaylit, maca ugur deffir wayeḍ. Ad tafeḍ iɛewwiqen ara k-iɛekren i wakken ur d-tettbaneḍ ara, yettuɣaḍ lḥal aṭas, maca ur d asen-nkennu ara”.
A. A

0