Ass-nni n larebɛa yezrin tasebḥit n wass, i uɣalen yinelmaden s wudem unṣib ɣer tɣuri i lmend n useggas aɣurbiz 2017-2018. Deg lwilaya n Tizi Uzzu, yecmen wazal 215 034 n yinelmaden tineɣriyin-nsen, deg kraḍ n yiswiren n usegmi yemxalafen (aɣerbaz amenzu, aɣerbaz alemmas akked tesnawit). D lwali n Tizi Uzzu, Mass Mohmed Bouderbali deg tesnawit n temdint tamaynut n Tizi Uzzu, i d-yellan ɣef beddu unṣib n useggas-agi aɣurbiz ajdid. Amḍan n yinelmaden iɣurbizen ara yeɣren aseggas-a, yebḍa akka: yella wazal n 113 337 n yinelmaden n uswir amezwaru n ulmad, ma d 65 606 n yinelmaden-nniḍen d wid n uɣerbaz alemmas, akked 36 091 n yinelmaden n tesnawit. Yella-d uqbal n yinelmaden-agi sɣur 903 n yiɣerbazen yellan deg wakal n lwilaya n Tizi Uzzu, gar-asen 657 n yiɣerbazen imenza, 179 n yiɣerbazen ilemmasen, akked 67 n tesnawiyin i yellin ass-nni n amhad tasebḥit n wass tiwwura-nsent i yinelmaden-agi i maynuten. Am wakken ara d tili tukci-nni n lemɛawna n yinelmaden inexṣen n (3 000 DA) i wazal n 105 000 akked yidlisen i yinelmaden-agi ur nezmir ara ad ten-id-aɣen d lbiɛ. Ma d iɣeblan i d-temlal tenmehla n usegmi n lwilaya n Tizi Uzzu, deg tuɣalin n useggas-agi d wigi: lexsas n yiselmadem, imi tuget n yiqdimen deg-sen fɣen ɣer tesɣimt. Lexsas n yinemhalen deg yiɣerbazen, ladɣa wid n yiɣerbazen imenza, imi mazal llan yiɣerbazen ur nesɛi ara inemhalen. Yella diɣ wugur n taččart n tneɣriyin s yinelmaden, ladɣa deg useggas amezwaru n uɣerbaz amenzu. Lexsas n yidlisen deg yiɣerbazen, ladɣa wid n uswir alemmas.
Azal n 94% n yiɣerbazen imenza, sɣaren tamaziɣt deg Bgayet
Ugar 187 700 n yinelmaden i yuɣalen s aɣerbaz deg lwilaya n Bgayet, i useggas-agi aɣurbiz ajdid 2017-2018, ass-nni n larebɛa 6 deg waggur-agi ideg nella. Uṭṭunen n yinelmaden n uɣerbaz amezwaru yewweḍ ɣer wazal n 106 289, deg-sen 17 327 d wid ara yeɣren deg tneɣriyin n uheggi. Deg uɣerbaz alemmas jerden yiman-nsen wazal n 59 683 n yinelmaden imaynuten. Ma deg tesnawit leḥsab n yinelmaden yewweḍ ɣer 31 729 n yinelmaden. Ad d-ilin ɣef lmendad-nsen wazal n 13 283 n yiselmaden gar yijdiden d yiqdimen, i useddu n temsirin akken iwulem lḥal deg teɣriyin. Ma d amḍan n yiselmaden yesɣaren tutlayt n tmaziɣt deg lwilaya-a n Bgayet, yelḥeq ɣer 895 n yiselmaden, gar-asen 367 d iselmaden n uswir amenzu n usegmi, s wakka tessaweḍ tenmehla n usegmi n tama-a ɣer 94% deg usekcem n tmaziɣt ɣer yiɣerbazen imenza, ma d 5 017 n yiselmaden-nniḍen sɣarayen ayen-nniḍen. Ttwaheggan-d daɣen wazal n 4 817 n yiselmaden n uswir alemmas n usegmi, deg-sen 385 d iselmaden n tutlayt n tmaziɣt deg uɣerbaz alemmas, s lqidar 84% n yiɣerbazen yesɛan tamaziɣt. Ma d amḍan n yiselmaden n tesnawit yelḥeq ɣer 3 084 n yiselmaden, gar-asen 143 d iselmaden n tmaziɣt, s lqidar n 52% n yinelmaden yeqqaren tamaziɣt deg uswir asniwi
Adaoun Abdelghani