Aḥric 7
Lhan-d warrac d tuffẓa d useble&epsilon,; ur nḥerwan, ur cliεen, ur rẓin iqerray-nsen γef wacu d wacuγer sellen i taγect-nni n tmeṭṭut. Din din, tujjaq tewwurt, ldin lelwaḥ-is, teffeγ-d γur-sen temγart annect n yemma jida “ abbaḥ yella wacu iγef ara yeccirew umdan dagi “. Tamγart-nni, ad tili tugar yakk timγarin yeddren lawan-nni. Udem-is yekmumec, lqedd-is yekna, terna tetteddu γef tεekkazt. Akken ṭṭreḍqent wallen n warrac fell-as, γlint-asen teγrifin seg yifassen-nsen seg tugdi. Teṭṭef-iten ula d tawla seg tergigit. Ma d tuγmas-nsen, ugarent tissirt ma teẓẓad. Teṭṭef temγart aγeṣmar-is, thuzz aqerruy-is, tenna-asen: ‘’Ay a yemma ḥebbi, way, way way! Acuγer akka tugadem ay arrac ibaḥḥanen? Lemḥadda lemḥarba γef tqeṛṛay-nwen a tarwa. Yyaw kan ihi ad teqqimem γur-i, ad iyi-twansem, ur yelli d acu ad ken-ixaṣṣen!’’. Teṭṭef-iten seg yifassen-nsen, tessekcem-iten s axxam, tessersasen-d udi d tamment d lqut yesseḥlawen ul n umuḍin mi ara t-iwali kan zdat-s. Ččan, swan almi d tikli ad fellqen iεebbaḍ-nsen, tekker temγart twenneε-asen-d usu s yiwet n trakna igerrzen. Sennden kan fell-as, tewwi-ten tnafa, ḥulfan s yiman-nsen amzun ẓẓlen deg tebḥirt n yijeğğigen deg tefsut. Tamγart-nni mačči d aḥdaq i teḥdeq, a ziγ nettat d teryel. Aγummu-nni tettγummu ssqef n uxxam-is s teγrifin, d ticerket i tneddi s wayen i warrac mi ara ten-yeṭṭef laẓ deg teẓgi akken neddin yimdanen tiqellaεin i imerga. Yal mi ara as-d-tḍegger tegnit yiwen, mi t-tuza, tečč-it. Tamcumt tacengut n tneqlin tenna-as i wul-is, yyaw ihi yewwi-ken-id uεessas, ass-a γur-i d tameγra. Nutenti teryulat-agi, γur-sent allen d tizeggaγin am yisufa, γef wayen ur ssegmaḍent ara s tmuγli, maca ttḥulfunt neγ ttfaqent am yeqjan n tεessast s yimdanen mi ara d-teddun γer tama-nsent. Mi akken i d-teddun γur-s Ḥmiṭuc d Duduc teḍṣa s ccah γef lqerḥ-nsen yakan, tenna-as i wul-is: ‘’Ḥala ansar ur tnessrem ara, yyaw kan tura ad awen-mleγ!’’ …Tettkemmil
Seg kabyle.com