Par DDK | 27 Aout 2018 | 806 lecture(s)

Bgayet

Asfuggel n lεid s wudem-nniḍen

Yesfuggul umaḍal ineslem yal aseggas lεid tameqqrant. Tafaska-a, d ttiεad i wakken ad yebḍu umdan tumert, talwit d wayen yelhan akked d gma-s. Abeεda azmummeg, asellem, asuref, mebla ma nettu afus n tallelt. Meεna di tallit-a, tuɣal lεid tesεa anamek-nniḍen. Amek? Newwi-d awal d waṭas n medden ɣef usentel-agi, nufa ɣur-sen timuɣliwin yimxalafen. Meεna dduklen akken ma llan d akken, gar zik d tura aṭas i ibeddlen. « Zik tella nniya, win yesεan yettεawan win ur nesεi. Γas ma yella kullec ixus, meεna nezga nennecreh. Ma d tura, d tallit n zzux, yal yiwen yettεassa gma-s ad yeɣli ». I aɣ-d-yenna yiwen n urgaz di ssuq. Am wakken i aɣ-d-mmeslayen ɣef yiwet n temsalt i nettidir iseggasen-agi ineggura. Nna Lǧida ur as-yaεjib wannect-n, dɣa tenna-aɣ-d : « Rẓan-aɣ iqerra-nneɣ s lḥerrayeq-nni timeqqranin. Yal mi ara tetterḍeq yiwet, ad yeldi uεebbuḍ-iw. Ula d arrac-nneɣ d amahi fell-asen». Terna-d daɣen: « Di zzman-nneɣ nekni, lεid tesεa sser, ma d tura tuɣal d ayen-nniḍen, yiwen ur yettqadar gma-s ». Rnu i waya, nger tamawt i yiwet n tɣawsa ɣef wacu ara d-nawi awal di taggara. Ayagi d ssuma n lmal i yulin s waṭas ladɣa ussan ineggura uqbel lεid. Aṭas i yettcektin ɣef waya, ladɣa wid ur nezmir ad d-aɣen. Asirem-nsen, ad sεun medden talsawit deg wulawen-nsen, ahat yal yiwen ad iḥus s waddad n wayeḍ.

K. K.

0