Ilmend n waggur n remḍan ideg nella deqs n leqdicat id-ittewheggan γef dema sγur tidukliwin yegaraden, ama d tidelsanin ama n tmetti.Dγa tidukla tadelsant Tiεwinin n Wizgan, n tγiwant n Wizgan, thegga-d yiwen n wahil adelsan d amesbaγur i icuden γer wuḍan n remḍan, i yebdan s wudem unṣib ass n 03 yulyu yezrin, d leqdic ara yeddun almi d as n 22 yulyu γef teγzi n 23 n wusan.
Deg ahil leqdic yella umezgun, cnawi, asenεet n yisura d waṭas niḍen. Akken ara d-tilli temzizelt n tmedyazt ass n 10 yulyu, d tajmilt i yiwen n unaẓur u d amedyaz n taddert-agi n Wizgan i tewwi tmettant deg aggur n yebrir yezrin, wagi d mass Muḥend Akli At-Σmara i yetwasnen s yisem n tẓuri Akli n At-Σemruc, anda ara ttekkin nnig n 30 n yimedyazen.
Si tama niḍen, tidukkla tadelsant Tiεwinin n Wizgan theggad leqdic niḍen s wazal-is, tagi d tazrigt tamenzut n wussan n umezgun n wizgan, ara-yebdun ass n 14 almi 22 yulyu, anda ara ttekint nnig n 15 n trebaε n umezgun n temnaḍin yemgaraden n lwilayat n Tizi-Wezzu d Bgayet.
Tafaska-agi ad-tilli s lemεawna n tmahliwin n yedles n Tizi-Wezzu d Bgayet, akked yexxamen n umezgun Kateb Yasin n Tizi-Wezzu d Σebd Lmalek Bugarmuḥ n bgayet. D tajmilt i unaẓur Mhenni Amroun i tewwi tmettant ass n 19 yebrir 2012, d mmi-s n taddert n Wizgan i iqedcen aṭas deg mezgun rnu yefkka-d deqs i yedles amaziγ.
Mbaεd tulya tunṣibt n tfaska-agi, ad-yilli ccḍaḥ afulkluri n tarbeεt n ccḍaḥ Tanalt, n temnaḍt n yimessuḥal, syen d taceqquft n umezgun meqren, s usentel; Ğellul Lefhaymi n unaẓur Σebd elqader Σellula ara turar tarbeεt n umezgun n Bgayet. Deg wass wis ssin d tarbaεt n umezgun Macahu n temnaḍt n Yifarḥunen ara d yuraren taceqquft s usentel Tafat deg ceqiq n ṭlam.
Iwesmekti kan, deqs n trebuεa n umezgun n temnaḍt n Wizgan, ger-asent; Aserhu n taddert n Mḥagga taγiwant n At-yeğğar, Asirem n Uzekka n taddert n Wizgan, tarbeεt n umezgun n Saḥel, Lemɛinṣṛa n taddert n Yibekkaren. Akken ara ttekint daγen 03 n trebuεa n umezgun n lwilaya n Bgayet, ger-asent, tarbeεt inemlayen n Wad Amizur ara d-yuraren tacequft s usentel Taxelwit n ciṭṭan, tarbeεt Lemri n temnaḍt leqṣar ara d-yuraren tacequft umezgun s usentel Agerruj Yefren, akked tarbeεt umezgun Guraya n temnaḍt n ticci, ara d-yurraren tacequft umezgun s usentel Lγeṛba tuεaṛ. Iswi n tmesbanit-agi, d asnarni n yedles amaziγ sumata, d temliliyin ger yemdanen, i uẓeṭṭa n tegmat d tdukli ger-asen. Akken daγen i tella d tagint yelhan anda i ttfarasen yemdanen ussan n imuras d wuḍan n remḍan.
Islam Bessaci