S tasa ineggin d iḥulfan akked wul yettfeggiḍen d tifriwissin i d-yulli Ben Moḥamed, aḥadad n wawal n teqbaylit, assen n sebt yezrin lehwi n leḥdac d uzgan n yiḍ ɣer s-ufella n usayes akken ad yawwi ammud n-isefra i yizumal n wid it-iḥamlen ( ugaren 2000) id yussan si yal tama n tmurt n leqbayel, akken ad-as rran tajmilt yuklal. I wakken timlilit-agi tamenzut gar umedyaz akked d-imsefliden n At wassif( yellan d lɛarc-is) a tɛeddi s wudem iwaten, imhaggiyen-ines deg yettiki HCA, Taɣiwant n Wassif akked tidukla tadelsant Taleṭat ur cuḥen ara deg allalen ara yernun sser i tamlilit yecban tagi. Degmi zdin wullawen ɣer yiwen n lebɣi dayen id yellan imi tisemɣert-agi, yuɣalen i bab n usefru yettwasnen « Baba Inuba » yesenfel ucanay ameqran n leqbayel Idir akkin deg umaḍal, tasemlal tasa d win turew. Zdat n imezdeɣ n lɛarc-is , zdat leḥbab-is id yussan si yal tama, u gar-assen Kamel Hamadi, Hassen Abassi, Slimane Chabi, Belkacem Hadjajd, Ahmed Oumaziz, Mourad Rehmane aselway n tɣiwant n Wassif, Hocine Haroune aselway n l’APW n Tizi Ouzou, Hamid Bilek, Abednnbi , Said Chemakh, Hachemi Assad ur d yufi ara Ben Mohamed awalen izemren ad innin akken ilaq ayen n lferḥ id hubben fell-as deg tagnit am tin ur nettwattu. Ahil n tisemɣert-agi yuɣalen i Ben Mohamed, ɣef llan di lmendad ssin imedyazen nniḍen Mass Ait Slimane Noredine bab n nnuba yettwasnen deg umataf n Tizi Wezzu « awal d aciri mačči d-asmiri » d Mass Slimane Belharet yettawasnen ula d netta s nnuba-t yexdem yakka deg umaṭaf wis ssin, yebḍa ɣef tlata yiḥadren. Aḥder amezwaru iṣaḥed i tmadyazt tamirent umu fkan udem iwulmen ssin n yimedyazen n At Wassif : Mourad Rahmane akked Ait Boussad Akli( Kiki). Aḥder wis ssin yettunefk i tmadyazt tuntayt imi d Lynda Koudache yellan d tamyarut id yewwin ammud n isefra yefkan abeḥri n telqaq i tamlilit n yid-nni. Aḥder aneggaru d win id yuɣalen i umdyaz yettraǧǧu s ccuq kra n win yellan din Ben Mohamed . Tabraḥt n uɣerbaz n lḥirfat (CFPA) n Wassif yegguma ad yawi ayen din n tullas akked yirgazen id neɣle, akken ad-as innin i Bab n usefru « Yemma » leqder akked lɛez id as-budden. Meɛlum ad yilli waya imi Ben Mohamed yella seg wid yezwin takka ɣef awal n teqbaylit, d netta i s-isersen idɣaɣen imenza i uɣalad atrar n tasekla taqbaylit. D netta i yefsin leqyud i umayag aqbayli akken ad yekcem annar n tasekla tamirant s yiwen udem yesigririben iɣerban n waglugel deg niqqal yella yewḥel wawal n teqbaylit . Anect-a d netta s timad-is it –id yenan deg yiwen gar isefra –ines imenza anda is yeqqar : Swiɣ itran s wuraw / Ullin-iyi-d s-aqaru / Yeɣlid ɣef yiẓri-w celwaw/Ttwakebleɣ deg wagu /
Tasusm-iw teftek tignaw / Tiɣri-w tuɣal d asefru
Tasimɣert-agi yeččuren d isefra akked lhu tekfa s tukci n warazen i kra n win yettaken deg-s , am akken tettunefk yiwet n tfelwit id yexdem yiwen unaẓur s demma i Ben Mohamed. Aya yella-d uqbel ad yasali ucenay Djamel Kanoun id yewwin kra n tezlatin tamaɣra-agi rran imezdeɣ n At wassi i Umedyaz n At Wassif. I tagara xas akken ɛaggu yettban ɣef udem-is, meɛna s tumert i yedda Ben Mohamed i lebɣi n kra wid it-iḥamel, akken ad ṭṭfen yid-s tugniwin, neɣ akken ad yer tiririt i yizumal n tuttriwin is id yettasen sya d sɣur ulemeẓyren yenḍen fell-as am ugraw.
Ait Slimane Hamid