Hacene Athmane, netta d aselway n tdukla Imnayen n tmezduɣt tasdawant Targa Uzemmur (Bgayet) ; newwi-d yid-s ameslay ɣef leqdic n tdukla, d liḥala yettidir unelmad di tesdawit s umata.
Aɣmis n Yimaziɣen : Amek i tettwaliḍ tudert n unelmad n wass-a a Ḥasan ?
Hacene Athmane : Yella lixṣas di yal tama, ama deg wayen yeɛnan ttawilat ibidagujiyen neɣ ttawilat n tudert di tmezduɣin tisdawanin. Anelmad n wass-a, yuɣal ttjeṛṛiben fell-as ahilen n uselmed am akken i xedmen s usekcem n unagraw n LMD deg umkan ad as-fken ttawilat i yuḥwaǧ akken ad inadi ɣef tmusni. Ma d ayen yeɛnan tudert di tmezduɣin n tesdawit, iɣeblan ṭṭuqten mačči d yiwen, yella lixṣas di kulci : tezdeg, laman, …Ula d amussu aduklan yenqes. Qbel ad inadi yiwen ɣef tifrat n wuguren, ilaq ad tili tdukli ger yinelmaden, acku d nettat i d lsas.
Tidukla Imnayen terra tajmilt i waṭas n yizumal n yidles am Muḥya d Isyaxem.
Acu daɣen n leqdic i tettmennim ad txedmem ɣer zdat ?
Nekni di tdukla nesseḥbibir ɣef yidles-nneɣ ; yal tikkelt nettarra tajmilt i tgejda n yidles amaziɣ s umata. Nexdem daɣen timzikent n udlis amaziɣ am akken daɣen i d-nsuddes ilindi tafaska n umezgun asdawan s tmaziɣt. Tura akka aqlaɣ nessewjad i wagur n cutembeṛ i d-iteddun taẓrigt tamezwarut n tfaska tagraɣlant tasdawant n ssinima amaziɣ. Tafaska-ya ad ttekkin deg-s yinaẓuṛen n tmura n Tmazɣa ara d-yasen seg Tunes, Lmeṛṛuk, Libya d Tegzirin Tiknariyin.
D acu-t yiswi i tesɛam s uɣmis « Awal Unelmad » ?
Awal Unelmad, d taseddaṛt ideg yal anelmad yesɛa awal-is, yezmer ad yaru s tlelli ɣef wayen i t-iqeṛṛḥen ama ɣef tegnit i yettidir di tesdawit neɣ ɣef yidles d tsertitit n tmurt. Aɣmis-nneɣ i d-nessufuɣ yal 15 n wussan, deg yal uṭṭun nettarra tajmilt i kra n tgejdit n yidles-nneɣ. Aya akk yella-d s lebɣi d leḥraṛa n wid yettarun d yimeɣriyen, mebla ma nettu unuɣen (caricatures) n gmat-nneɣ Ghilas Ainouche i as-d-yernan cbaḥa i uɣmis.
Yesteqsa-t Mokrane Chikhi