Aql-aɣ deg tsemhuyt n umwan, lawan ideg beddun yiɛeqqayen n uzemmur ttebriken, tewwan. Deg yiseggasen yezrin, imezdaɣ n Ayt Smaɛel d kra n temnaḍin tijartin, ttafen, ttwalin tiferkiwin-nsen ideg sɛan ṭṭjur n uzemmur, urwent aṭas, fkant-d lɣella n lɛali. Lameɛna lḥal yemgerrad aseggas-a, imi llan yifurak n tzemrin, ad ten-naf ɛebban ciṭṭuḥ n yiɛeqqayen, llan wiyaḍ d ilem. Azemmur ihi ur yessefreḥ lɣaci n Ayt Smaɛel, Tasexriwt, Rrif, Iderginen… atg. Yessewhem-iten imi ur d-yefki ayen niqal ttraǧun sɣur-s. Anagar ileqqamen yellan sdat neɣ deg rrif n yiberdan i yurwen s ccyaḍa, acku, ɛlaḥsab ayen i d-qqaren wid yessnen, azemmur itesra i uɣebbar. Meḥsub, d annect-nni i iɛiwnen tizemrin iqerben abrid ad ftint aṭas.
Ɣas ma simmal yettɛedday wakud, tettaẓ-d tegrest, yettaẓ-d lawan ideg ggaren yimdanen deg ccɣel n usram d tleqqaḍt, maca tuget n yiterrasen n Ayt Smaɛel d tid-nniḍen, ur ttqellqen melmi ara d-yawweḍ wass-nni. Sḥassfen imi drus maḍi i yefti aseggas-a, ur ẓrin d anta i d ssebba taḥeqqanit, neɣ d anwa d ugur. Ɣef wamek nettwali, daɣen, addad n uzemmur, atan iban seg tura ad yekkes leqdic-ines s tazzla, ur yettɛeṭṭil ara ad yefru. Ladɣa imi aṭas i d-yetteɣlayen ɣer lqaɛa, yettwajmaɛ tikwal send lweqt n usram. Daymi yettenqas ccɣel-is kra kra, yessewzal tawala (période) i yezmer ad yekk yiwen deg-s.
Skud azemmur ur irew ahat aṭas deg kra n temnaḍin n leqbayel, yiwet seg-sent d tin n Ayt Smaɛel, iban belli ssuma n zzit-is tetteddu ad tzid, ad teɣlay ugar n wamek tella tura. Seg 800 n yidinaren, yezmer ad teɛlay alama d 1000 n yidinaren. Ula d taǧǧawt-ines llan wid i tt-yebdan yakan, imi ḥsan ma yeqqim waddad akka, ad tettenqas zzit seg lexsas n uzemmur. Ɣef waya i ilaq ɣef wid ikesben littaɛ di tferkiwin-nsen, ad teẓẓun ṭṭjur-a n uzemmur, ad asent-xedmen ttawilat iwulmen akken ad yeṭṭuqqet deg yidigan, ad d-yeqqel am zik. Acku zzit n uzemmur, tettwawfay i qeddac n tɣawsiwin, ulayɣer astehzi deg-s.
Kaisa Khalifi