Par DDK | 10 Septembre 2018 | 816 lecture(s)

Ayt Rẓin

Mtawant tddukkliwin ɣef yisuḍaf n tmeɣra

Ilaq ad d-nini aṭas i yellan d anuɣni deg tmetti ɣef taluft yerzan tameɣra n tallit-a, d wayen i tt-id-yeṭṭafaren di tmurt n leqbayel. Tidet yellan, d timḍerrit-nni i d-yewwi usetrer (modernisation) n tmeɣriwin-a, ama i yidles d wansayen, neɣ i tmetti d yimezdaɣ. Amedya n DJ i yekksen amḍiq i yicennayen, i yiḍebbalen d wurar n lxalat. Rnu, yettɛedday-d wayen i d-yewwi Rebbi d ccna, s yal tutlayt d yal asentel, i yeffɣen akk i tannumi n tudert n yimesdurar. Iseggasen-a ineggura, yennulfa-d ula d asṭerḍeq n tḥerrayqin-nni timeqqranin i yesbeɛziqen akk ixxamen. D ayen i yeǧǧan dɣa agraw n kra n tddukkliwin di tɣiwant n Ayt Rẓin, tadayra n Yiɣil Ɛli, ad d-gent yiwen n ulɣu ɣef taluft-a, send anejmuɛ gar yiɛeggalen-nsent, i yimezdaɣ akk n temnaḍt-nni. Deg-s, nwan xersum ad ḥazen kra n lecɣal i bɣan ad kksen. Gar yisaḍufen i d-ssuffɣen wat tddukkliwin-a, yella yiwen yeqqen i wakud n ccna s DJ deg yiḍ, i d-yettwaɛeyynen ɣer ttnesfa n yiḍ, ma iɛeṭṭel. Wayeḍ yerza ingulen (igaṭuten) n tbewwaḍt i walan ulayɣer ad ttwamsaɣen sya d tasawent. Mcawren ula ɣef tgella n dewwara, i kksen daɣen imi d-tettmagga s wayen inuḥen deg ukecric n tfunast. Wayeḍ n usaḍuf, icudd ɣer tedrimt ara yettunefkayen d ccerḍ yal tissulya. Ma yella d taxatemt, sersen ssuma tafellayt deg 100 000 n yidinaren. Gar tmentilin n waya, akken i d-tewwi teɣbalut-nneɣ, d mi walan aṭas n yigellilen i yeqqimen war arcal ɣef ssebba n teɣlayt n tmeɣra. Ad d-nesmekti d akken seg 9 n tddukkliwin i iḍebbren ɣef rray-a, llant abeɛda tid n yidles, n usɣan akked yiseqquma n tuddar. Ahat d asurif amezwaru, akken ad izmirent tddukkliwin ad d-ḥettment asaḍuf yelhan deg tuddar, sya ar d-uɣalent tjemmuyaɛ s annar.

M. K.

0