Teḍra-d yiwet n tirza n yiɛeggalen n Useqqamu unnig n timmuzɣa, ass-nni n ssebt 08 cutember 2018, ɣer temnaḍt n Tgemmunt Ɛezzuz (taɣiwant n Ayt Meḥmud, 20 n yikilumitren deg unẓul-asamer n Tizi Uzzu), akken ad ssfeqden imuhal n useḍru n usebdad n ugellid amaziɣ Massensen deg usikew (atelier) i d-yelhan yis-s. D amaray amatu n Useqqamu unnig n timmuzɣa, Mass Si El Hachemi Assad, i yellan ɣef uqerru n tmagla-a (délégation) n tuddssa (HCA) ɣer yid-s umesɣiwan (aselway n tɣiwant) n Lezzayer talemmast, Mass Abdelhakim Bettache, ɣer yidis n Mohamed El Hadi Hireche akked uselway n tesqamut n « Temsizwert taɣelnawt n useḍru n usebdad n Masensen », i d-yelḥan s leqdic-agi. Deg yiwen n yinaw (discours) wezzilen i tɣamsa, yerra Mass Assad tajmilt i wid akk yettekkan deg userbeḥ n tekti-a, am wakken i d-yenna : « Leqdic-agi, ad yettwanqec i lebda deg umezruy-nneɣ d win n temnaḍt-a n At Dwala, i d-yefkan aṭas i timmuzɣa ». Asbedad-a, ad yesɛu 3 n lmitrat deg teɣzi, yerna ad d-yesqam s 24 n yimelyunen n yidinaren. Yetturaǧu, ad yettwasbed deg tazwara n useggas i d-itteddun, deg umraḥ n Tafura, deg tɣiwant n Lezzayer talemmast, ɣef wakken i t-id-yenna uselway n tɣiwant n Lezzayer tamaneɣt, Mass Abdelhakim Bettache. Takti n usseḍru n usebdad n ugellid anumidi Masnsen, tella-d deg taggara n usarag-nni agraɣlan i d-yettwassuddsen ɣef ugellid-a deg temdint n Lexrub, deg lwilaya n Qsenṭina, deg useggas n 2014, ɣef wakken i t-id-yenna Mass Assad: “Asebdad-agi, seg yidis azamulan, yesɛa azal meqqren, imi ad yettekki deg useɣref (vulgarisation) n umezruy azzayri”. Ad d-nesmekti, belli timsizwert-agi taɣelnawt i useḍru n usebdad-agi, tebda deg useggas n 2015, anda i tefka teseqqamut n ufran tagnit i yinaẓuren yettenǧaren aẓru, i wakken ad ttekkint deg usenfar-a. Snat n tikkal i tfuk temsizwert-a war agemmuḍ iqqenɛen taseqqamut i d-yelhan yis-s. Sakin, deg tikkelt tis tlata, fernen asikew n “Ingel” i unǧer n uẓru, ɣef wakken i t-id-yenna Mohamed El Hadi Hireche, aselway n teseqqamut n temsizwert-a. Ɣer taggara, iger-d Mass Assad tiɣri, i lmend n waya, i yimasayen (responsables) n temdinin n Ɛennaba, Suq Ahṛas d Ɛin Timucent akken ad ḍefrent amedya n tɣiwant n Lezzayer talemmast, yerna ad ssersent isebdaden d tajmilt i wudmawen-a imezruyanen i uttekki deg usisen d tmussni n umezruy-nneɣ.
Adaoun Abdelghani