Anekcum ɣer lǧennet ( tamsunt) yessutur tezdeg deg ul akked d tezdeg di ṣṣuṛa. Xersum akka i d-qqaren wid ibedden ɣef tewwura akken ad anin anwa ara iɛeddin anwa ara yegrin. Meɛna ma yella tuget n yemdanen mmsefhamen ɣef wamek i ilaq ad yeddu umdan akken abrid ad as-yenǧer ddaw iḍaṛṛen-is ɣer uɛeddi ɣer ṛṛeḥba yifen yak kra yellan d ṛṛeḥba , mazal ( ɣer tura ) ur msefhamen ara acu i d-tamsunt d wanda tella tamsunt. Yal wa amek i tt-yettwali, yal wa amek i-tt-yettarggu. Meɛna wid ifaqen ( uqbel wiyaḍ deg akken tzad ɣer-sen tiḥerci) gzin si zik lḥal anta i d-tamsunt n tidet. Tamsunt ɣer wid yeṭṭurcen d adabu d wayen id yettawi udabu i bab-is. Akken ad awḍen lebɣi-nsen , ɛamden i kra yellan. Tamezwarut selɣen udmawen-nsen s iselwan akken ad zwin leḥya akked tezwaɣ ( tezwaɣ id tettawi leḥya) ɣef timira-nsen. Ɣef aya uɣalen ur ttsetḥin la s-lɛar, la tukerḍa, la s-lekdeb akked tikerkas ḍellun tirni anda ma ddan. T-is tlata d berru n isider n w-allen. Akken ibɣu xnunnsen d awezɣi ad ṣṣubben lecfar-nsen zdat n ugdud i ten-yettqazamen. T-is rebɛa mḥan deg umawal-nsen isem n nnif, leqder, tayri, lemɣiḍa, a ḥezzeb. Ɣer-sen yal tablaṭ telha akken ad ɣeḍlen yid nnican qesden yekka. Tanekra n-sen uqbel ad iɛlem lefjer ,acku ẓran taṣebḥit i tezzuzur teqdrit rbeḥ. Mi id ufan medden mazal ṭsen, rennu-asen tadulli. Zuzunen-ten simmal s “ xuc… xuc … mazal lḥal”. Lemmer ufin a ten-yezdeɣ meɣrud i lebda. Ttawin yal aḥeckul, yal aɛeqqaṛ akken wid i ten yettnamaren d awezɣi ad refden s lecfarṛ Amdan yelhan( ɣer-sen) d win yennuddmen. D tagi id tamsirt-nsen. d tagi i d -lmissa-nsen. S w-akka abrid ad yegri kan i nutni. Zdat n temlal ilaq ad ilin mellulit ugar-is. Zdat n tezdeg ilaq ad ilin zeddig-it nnig-as. Ɣef aya ḥamlen ad sburren abeṛnus amellal akken ad dlen ilefḍan yesburr ixf-nsen. Ḥamlen ad ilin d tiɛeqqucin wuɣur tezzi tmuɣli. Lemmer ufin xas iṭij ad yemundel akken ad tegri tafat-nsen kan nitni. Tariqa-nsen d tagi: “ xtir lekdeb iḥercan akken imɣendfen yi-sen ara ttamnen. yid-sen kna ad teddun. Ilaq agdud ad yefk annuz i w-ayen iẓer , ula i t-yewwin ad yedlu ɣef ayen iḍeṛṛun di lqaɛ n tamda. Ɣef aya ggan gar-ifasen-is aɣenja ameɛlal ur nezmir ad yesali ayen yellan di tasilt. Simmal yettimɣur lekdeb , simmal yettɛeddi deg a cwari . Teḍṛa-tt d lqum am akken is yeqqar wawal n widak-nni: ” kellex-iyi ad ak amneɣ!” Dɣa seg ass-n nnumen. Nnumen wid iɣ-ssumen adif deg iɣes. Nnumen wid i ɣ-yekksen awal ɣef yiles. Numan wid i ɣ-icleqfen talqimt seg imi. Nnumen wid i ɣ-iḥewsen awali seg allen.Nnumen wid i ɣ-icleqfen timesliwt seg imezuɣen. Nefka lemqud i leɣrur , dɣa yesmar-d fell aɣ leḥmali n ẓẓur. Ahat llan wid yecfan i tallit-nniɣ deg tɛaliqqen ticrurin i welɣem akken gma-s a t-yerdem. Ahat llan wid yecfan i lamin yuɣalen d lqayed akken ɣef ayetma-s ad isayed. Meɛna wicqa ma llan wid yettun imi akken is yeqqar wina: “ hum u ɣum , Ṛebbi aɛziz lebṣel qerreḥ!”. Yettnexfat lmeɛqul zdat tugniwin id yewwi lḥal. Yenna ccix deg awal-is “ llah llah, tesbiḥ deg ufus-ines, ajenwi deg ul-ines!”. Tamacahut mazal tekfa , nekni nefka i tayeḍ nuba…a win ileḥḥun deg yid… ukren-ak nuba at zzhir ɣef tafrara. Win i tt-yexlan yeɛmeṛ, ma d Ɛamer..fell-as werǧin teɛmeṛ. Akka id udem n Lẓẓayer n wass-a. Anda iɛajjer ccix bu Yiṭij i yezdew ccix bu tezwaɣ..anda teldi tewwurt n lemqam I tendel tin n lewqam!
A. S Hamid