Ass n 10 tuber yezrin, ihegga-d lwali amaynut n Bgayet, Mass Ḥmed Maɛbed, yiwet n temlilit akked yimazanen (députés)n twilayt n Bgayet i umeslay ɣef waṭas n tlufa i icudden ɣer tneflit abeɛda, akked yineḍruyen i d-yettnulfun taggara-a. Ula d Mass Mhenni Ḥadadu, aselway n Useqqamu aɣerfan n lwilya, yeḥḍer i ttiɛad n wass-nni. Deg umlaqi-a dɣa, i yekkan qrib ukuẓ (4) n yisragen, yella-d umciwer d umbaddal n tektiwin ɣef wayendin d tilufa i iceɣben aɣerman akked waddad amiran n waɣir n Bgayet. Din ihi, yettwawi-d wawal ɣef ddeqs n yisenfaren iɣef yuzzel wawal imalasen iɛeddan, d wid i urɛad yekfi ccɣel-nsen, neɣ yessutur-d ugdud ad ttwajerrden s uzrab. Ad d-nebder seg-sen abrid amadaf (la pénétrante) ur nettɛeṭṭil ara ad tamed, Sbiṭar n Bgayet, asenfar n tramway, abrid n Ɛecba n Xerraṭa i ṭṭfent snat n tkebbuniyin Taṭurkit-Tazayrit, lgaz agaman deg temnaḍin timesdurar akked usnulfu n tyuga i ubrid aɣelnaw wis 9 d ubrid n tmacint n Bgayet. Ad d-nesmekti d akken, ɣef ubrid aɣelnaw wis 9, yella yura umazan n FFS, Mass Nasir Ɛebdun, i uneɣlaf n yiqeddicen izuyaz, ideg i as-yessuter ad d-yeslal s teɣseb asenfar deg ubrid-nni i yuɣalen d amihi n tidet i yinehharen. Daɣen, deg tɣimit-a i asen-d-yellan, bedren-d yimḍebbren kra n yisental-nniḍen iseg tenṭer Bgayet, am temɛayt n ugzam n yiberdan i yetteɣzifen trennu, lebni berra i usaḍuf, tamsalt n tnezduɣt s umata, tasdawit tamaynut n Amizur, asefti n tedrimt s yisenfaren yemgaraden, tirza n yineɣlafen ɣer Bgayet akked taluft n tezdeg n tɣiwanin d tamiwin i iɛemren s yiguduyen sanda ma terriḍ, deg usamar neɣ deg umalu.
M. K.