Macahu tellemcahu ad tt-yeḍbeε Ṛebbi d asaru. Yiwet n tikkelt, yelluẓ wuccen, armi a-t-an iwala ileɣman d abrid ad uɣalen ɣer tmurt-nsen. Mbaεd mi yenza wayen i d-wwin, uccen iwala icenfir n ulɣem meqqer, iεelleq-d am ucriḥ. Ihi, iḍmeε, iɣil ad d-iɣli. La t-yetabaε di lqafla-nni n yileɣman, armi tekcem ṣṣeḥra. Yeɛya wuccen yerna tiqejjirin-is d tireqqaqin, ur ddint ara d ṛṛmel n ṣṣeḥra. Yedda armi dayen yeεya, ur izmir ara ifad d laẓ, yeɣli ɣer lqaεa yenna-as: “ Ruḥ ay alɣem di slama ,anef i wuccen yemmet d aɣrib”. Yiwen wass daɣen iluẓ yef taneqlet teččuṛ d iniɣman akken yebɣa. Yečča armi yeqber, yenṭeq yenna-as: “Tanemirt-im degmi i am-qaṛṛen lkarma”. Yiwet n tikkelt, iluẓ, yemmekta-d taneqlet-nni. Yuzzel-d ɣer-s, yaf-itt d taεeryant: ulac deg-s ula d iffer. Yuɣal yezεef yenna-as: “D nnḥas-nni yellan deg-m i kem-yeǧǧan akka”.
Yahia Yanes