Akken i d- nniɣ ur d -nniɣ ara fell-ak ay ameddakkel . Lmut-ik tecweḍ tasiwin-nneɣ . Teḍra –aɣ am winna iwumi tufeg tɣawsa ger yifassen-is ur yebni fell-as. Ruḥeɣ am wakken ur umineɣ ara s yisali n lmut-ik iyi-d yefka umaddakkel–ik Mhena Budinar « Nuṛ yewweḍ ɣer wanda ara naweḍ.
D taqbaylit i-iǧǧlen, d tigejdit i iɣlin. Mi iyi-d -ttuɣalen waktayen n wayen yakk nesɛedda, deg umennuɣ ɣef tmaziɣt gummeɣ ad ten-zḍeɣ di tagnit-agi yesbur weɛdil n ṭlam. Mačči d menwela i-aɣ- iruḥen. Ur tettuɣ ara tabɣest tesɛiḍ mi nella di Ben Ɛeknun deg useggas n 1995 asmi nettheggi iman-nneɣ a nesselmed tamaziɣt i tikkelt tamezwarut deg uɣerbaz n tmurt n Lezzayer ifassen-nneɣ d ilmawen. Ussan-nni tenniḍ-aɣ-id di lefwar n uskasi : « ur ilaq ara a nkukru, yella wacu i aɣ- d yeǧǧa Dda Lmulud a ten-ssefti ». Tezgiḍ-d d iɛiniḍ i wid-ak ikerrfen ifadden , akked d lebɣi n yiselmaden n tmaziɣt.
Ur tettuɣ-ara diɣ, taɛessat-nni nettara s nnuba di Ben Ɛaknun yal mi ara d-yeɣli yiḍ akken ad nḥareb ɣef yiman-nneɣ acku rebrrab di tegnit-nni yeseɣli-d rrehba ɣef Lezzayer tamanaɣt, Kečč tattawid tettareḍ akked kra n yimddukkel n Tubiret d Bgayet tettalseḍ-d i temseḍsay akken ad yezri yiḍ. Werǧin, i k-waleɣ terfiḍ . Ur tettuɣ ara timliliyin -nni i nettheggi i usileɣ deg useggas n 1996 -1997 akken ad neffeɣ s wahil uselmed i warrac –nneɣ d teḥdayin-nneɣ. Nekker-as i ucqirew s wulac. Aṭas ur numin- ara di lawan-nni s tmaziɣt deg uɣerbaz. Kečč teqqareḍ-d wagi i d annar n userwet, tewwi-d kan a nexnunes ! Ur tettuɣ ara diɣ aseggas n 2002 mi ik-muggreɣ s ugacur di Lpari( place clichet) , awal amazweru id yeffɣen seg yimi-k mi neqqim ɣer ṭṭabla di lqehwa : « amek iteddu uselmed n tmaziɣt ass-a ? » uqbel ad d- tseqsiḍ ɣef yemddukkal-ik teǧǧiḍ di tmurt yecban Murad Mellab , Ferhat At Muḥend, Mḥend Ibesɛayen iwumi tassawaleḍ Muḥya , Qader Belɛidi …d wiyaḍ meṛṛa.
Tzegreḍ ɣer Lpari mačči d tisemmamin d tiqacacin ( timeseḍmaɛ) akked zhu i ak-yewwin, teddiḍ dinna akken i tettedduḍ di tmurt, tamaziɣt .. tamaziɣt… tamaziɣt ! Aya tesbeggneḍ-t-id am waqqaren n yiṭij s demma n tedwilt n temsirin n tmaziɣt i-ikecmen yal axxam ,yal taxlijt di yal tamnaḍt , yal tamurt anda llan imaziɣen s ttawil n BRTV.
I kečč ay udem n lemri , a win yugin tamaziɣt n « les salons » , yugin ad tedduḍ s tikli n tifiɛerqas , d wigi i d-yeddan deg tmeqwa tineggura, yesneɛmalen qeddcen ɣef tamaziɣt , nutni ur sinen ad tt-arun.
tekkreḍ-d d ameɣnas, tnuḍḥeḍ s tissas, terziḍ ɣer itran deg ttemlilin wid iwumi ur tezmir tmettant, akken ad tilliḍ ɣer yidisan n Mammeri , n Lwenas, Jaɛfer waḥyun, Muḥend u Harun d kra n win irefden senjaq n teqbaylit !
Ɛarqub Ɛebdellah