Aqli di Tubiret, ar umdakel-nneɣ Tahar Uld Amar yeggulen ad tili tmaziɣt di tɣamsa, akken yeggul Nur ad tili di tilifizyun, u tella. Hqa, ahat ur tesliḍ, Nur Uld Amara yelḥan di lǧerra-k, tanṭelt-is tella-d iḍelli di Kuku…
Aqli deffir n uselkim, ttaruɣ awal ameẓyan, d tajmilt i kečč a Smaɛil. Di tgerjumt, imeṭṭawen ḥegnen nnefs, acku tugi ad twexxer taḍsa-k gar wallen-iw.
Deg zenqan n Lasifa di Bgayet, mazal tili-k tettnaḍaḥ, kečč yesbedden tadukli tamezwarut n lḥuma-a zedɣen imeɣban d yixeddamen.
Deg uxxam n umezgun Malek Bugermuḥ mazal lexyal-ik yettali yettader kečč d Tahar Ǧaɛut d imedyazen merra d-tnecced tidukla tadelsant n Summam. D kečč i d aselway-is imiren, fell-ak ntezzi-d am tzizwa…
Ɣef tiɣilt n Yemma Ǧewwa, mazal imdukal-ik cfan ɣef Smaɛil, udem n talwit d usirem yefkan tazmert i yal aɛeggal…
Taklut, isefra, tullisin, kra din ad k-id-yesmektay i wid ara yelḥun deg ubrid n tafat…
Ruḍ di lehna a Smaɛil, siweḍ slam i Tahar, i Lwennas, i kra yezwaren deg tikli ara nelḥu azekka akken ad neǧ amkan i tsutiwin ara yesǧuǧgen tamurt tḥemmleḍ ugar n kra yellan di tudert.
Ar tufat…
Brahim Tazaɣart