Am yal aseggas, mi ara-d yaweḍ unebdu ad yebdu yid-s umerret ɣef tiqit n waman deg tudrin, maca aseggas-a yewweḍ ṣṣber ɣer lḥed-s! Timnaḍin n ugafa, am tɣiwanin n Tigzirt, Iflisen, Azeffun, At Wagnun d tid n unẓul n twilayt, am tɣiwanin n Tizi £enif, draɛ Lmizan, Iwaḍiyen d tiyaḍ nṭarrent mačči d kra deg lawan-a n lḥuman d remḍan. Ayen yeṣṣawḍen imezdaɣ ad fɣen ɣer yiberdan, ad medlen tiwwura n tɣiwanin, ddayrat akked tkebbaniyin i d-yelhan s uḥric n waman iwakken ad d-beggnen lɣiḍ nsen.
Si tama-s, aselway n ugraw aɣerfan n ugerzu n Tizi Wezzu, mass Maḥfuḍ Belabbes yessuter s-ɣur yimḍebber n wuggugen neɣ ayen iwumi neqqar agence nationale des barrages et des transferts, tifrat n wugur-a , imi tawilayt n Tizi Wezzu d tamerkantit s waman ama d wid n yisaffen neɣ wid n wuggugen. Ɣef leḥsab n yisallen I aɣ-d-yewwḍen, yella yakan yiwen n usenfar n usiweḍ n waman ɣer temnaḍt n unẓul n twilayt seg wuggug Takudit Userdun, ma s asammar seg Taqsebt uqbel taggara n waggur n yulyu yezrin, maca ar tura ur d-iban kra di ccɣel-agi. Iwulem kan ad d-nini d akken taluft n waman d tin irekkmen seg wass ɣer wayeḍ, imi seg tama imezdaɣ ccektayen ɣef lixṣas, si tayeḍ nettwali iberdan akk neggin d aman !
D. I