Tawacult n tẓuri taqbaylit terra tamuɣli i tikkelt taneggarut i yiwen seg yiɛeggalen-is yewḍen leɛfu n Rebbi deg wyimalas yezrin. Mulud Ḥabib, imi d wa i aɣ-yeǧǧan, d yiwen seg wudmawen yettasnen s tezlatin-is yezuzunen.
Tamettant-is i d-isersen leḥzen meqren tella-d di sbiṭer n Mustapha Pacha di Lezzayer tameneɣt anda i t-yessaweḍ waṭṭan i t-izedɣen acḥal d aseggas. Ɣas akka iɣab wudem-is, Mulud Ḥabib yeǧǧa-d deffir-s agerruj ara yilin di lmendad i tsutwin i d-iteddun. Deg useggas yezrin, tuɣal-as tejmilt di Tizi wezzu anda i ḥeḍren aṭas n yinaẓuren d wid akk i t-iḥemlen, rran-as afud iwakken ad yessekles ayen akken yerra di rrif. Maca, ur as-teǧǧi ara tezmert-is iwakken ad yaweḍ lebɣi-s. Tamettant n unaẓur-a d tin i d-yernan taɛkemt i wayen yellan yakan, imi tusa-d deffir tin n Bugermuḥ, Crif Xeddam, Ben Ḥanafi d Mhenni. D tawacult n tẓuri i yettwaḥuzan, meɛna skud akka i d-tteflalin yitran, idles amaziɣ ad yaɣ abrid n unerni.
Islam Bessaci