Pierre Bourdieu d yiwen n umusnaw n tmurt n Fransa i iqedcen aṭas γef tmetti tazzayrit. Ilul deg useggas n 1930, yewweḍ leεfu n Ṛebbi deg useggas n 2002. Yusa-d γer Lezzayer akken ad yesεeddi lεeskeṛ deg yiseggasen n 50, seg 1958 armi d 1960 yella d aselmad n tfelsafit di tesdawit n Lezzayer. Di tallit-nni i d-yelletha akked tmetti tazzayrit, timetti ur ssawḍen ara ad fehmen yitnugṛafen(ethnographes) n tedbelt taserdast n tallit-nni imi nutni s tmuγli n temḥeqṛanit iss ttwalin imezdaγ. Pierre Bourdieu yeǧǧa-d aṭas n leqdicat ussnanen γef tmetti tazzayrit, gar-asen adlis umi isemma »Ssusyulujiya n Lezzayer neγ Sociologie de l’Algérie » d waṭas n tsestanin i iga deg unnar(enquêtes du terrain) γef tmurt n Leqbayel. Ddurt yezrin tuγal-as tejmilt d tameqṛant di Wehṛan iγer d-usan waṭas n yisdawiyen ama seg tesdawiyin n tmurt neγ tid n Fransa. Tajmilt-a i as-ttyerran d Asqamu Unnig n Timmuzγa(HCA) akked Wammas Aγelnaw n Unadi di Tesnalest Tamettayt Tadelsant(CRASC). Aγmis n Yimaziγen yella-d d inebgi γer tejmilt-a tussnant i wumi fkan azwel: »Pierre Bourdieu d Lezzayer : ayla yezdin, timnaḍin timazγawalin d lγeṛba ». Ger wid i d-yefkan isaragen di temlilit-a, ad nebder mass Kamel Chachoua( amnadi di CNRS d CNRAPH, yetwasnen daγen s tezrawt i iga γef lislam γer Leqbayel l’Islam Kabyle), netta yemmeslay-d γef wassaγen yellan ger Dda Lmulud d Pierre Bourdieu. Seg yisaragen daγen i wumi neḥḍeṛ, win i d-yewwi mass Hadibi Mohand Akli s wezwel: » taγuṛi tunqidt n udlis ssusyulujiya n Lezzayer ». Timlilit-a daγen tella-d d tagnit i yineγmasen i iḥeḍṛen deg umkan akken ad fken isteqsiyen-nsen i mass Youcef Merahi (amaray amatu n HCA) γef wayen yerzan liḥala ideg tettidir tmaziγt ass-a, netta yemmeslay-asen-d s umata γef wuguren yellan deg unnar ladγa deg uḥric n uselmed. Ma d iwellihen iss d-ffγen wid yettekkan deg temlilit-a tussnant i d-yeḍṛan deg wammas n l’CRASC, i yeṭṭfen lwelha seg-sen, d asuter seg uγlif n usegmi aγelnaw akken ad yessekcem iḍṛisen n Pierre Bourdieu deg wahilen yemxalafen n uselmed.
Mokrane Chikhi